EAEO álemdegi mańyzdy kólik-logıstıka toraby bola alady - Toqaev

ASTANA. KAZINFORM — Qasym-Jomart Toqaev EAEO álemdegi mańyzdy kólik-logıstıka toraby bola alatynyn aıtty.

– Birlestik quramyndaǵy memleketterdiń aýmaǵy arqyly Batys Qytaı – Batys Eýropa, Soltústik – Ońtústik, Transkaspıı halyqaralyq kólik baǵdary sekildi negizgi dálizder ótedi. Qazaqstan sheteldik seriktestermen birge (Reseı Federatsııasynda, Qytaıda, Ázerbaıjanda jáne basqa da elderde) halyqaralyq mýltımodaldy logıstıka ortalyqtary men termınaldar jelisin (Rýmynııa men Majarstanda) damytýdy belsendi qolǵa aldy. Seriktesterimizdi saýda-sattyqty jandandyryp, júk tasymaly shyǵynyn azaıtý úshin uıymǵa múshe ózge memleketterdi de osy iske atsalysýǵa shaqyramyz, – dedi Prezıdent.

Memleket basshysy Qazaqstannyń Kaspıı jaǵalaýyndaǵy teńiz ınfraqurylymy arqyly yntymaqtastyqtyń tyń múmkindikterine jol ashylatynyn jetkizdi.

Prezıdenttiń aıtýynsha, Kaspıı teńizindegi negizgi porttarda ornalasqan zamanaýı konteıner habtary udaıy ulǵaıyp kele jatqan júk tasymalyna qyzmet kórsete alady. Bul rette ol uıymǵa múshe elderdiń tranzıt áleýetin nyǵaıtýǵa serpin beretin Keme qatynasy týraly kelisimniń kúshine enýin jedeldetýge shaqyrdy.

Qasym-Jomart Toqaevtyń aıtýynsha, álemde suranysqa ıe, qosylǵan quny joǵary ónim shyǵarýǵa baǵdarlanǵan jańa óndiris oryndaryn damytýǵa basa mán bergen jón.

– Eýrazııa damý banki sarapshylarynyń esebine sáıkes, EAEO elderiniń ónerkásip taýarlaryn shyǵarý jáne eksporttaý boıynsha qosymsha múmkindigi 67 mıllıard dollarǵa baǵalanady. Osy áleýetimizdi tolyq paıdalansaq, túpki nátıjesi 500 mıllıard dollarǵa jetýi yqtımal. Atalǵan maqsatqa jetý úshin ónerkásip kooperatsııasyn kúsheıtý qajet. Bul oraıda serpindi ınnovatsııalyq jobalarǵa ınvestıtsııa quıǵan jón, – dedi Qazaqstan Prezıdenti.

Aıta keteıik, Prezıdent bıyl EAEO-ǵa múshe memleketterdiń jıyntyq ІJÓ kólemi 2 paıyzǵa ulǵaıatynyn aıtty.