EADB jańa strategııany bekitti: Qazaqstanǵa ınvestıtsııa tartý jalǵasady
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov Eýrazııa damý banki keńesiniń otyrysyn ótkizdi. Jıynda banktiń 2025 jylǵy qyzmetiniń qorytyndylary qaralyp, 2027-2031 jyldarǵa arnalǵan jańa damý strategııasy bekitildi. Bul týraly Úkimettiń baspasóz qyzmeti málim etti.
Oljas Bektenov bıyl Eýrazııa damý bankiniń qurylǵanyna 20 jyl tolatynyn atap ótip, bank qyzmet etken jyldary qatysýshy memleketterdiń ekonomıkalarynyń damýyna eleýli úles qosqanyn, sondaı-aq onyń aldaǵy ýaqytta da odan ári serpindi damýyna senim bildirdi. Búginde EADB jeti eldi biriktiredi, 2025 jyldyń qorytyndysy boıynsha banktiń jınaqtalǵan portfelinde jalpy ınvestıtsııa kólemi $19,6 mlrd bolatyn 326 joba, al bank seriktesteri jobalarǵa tartqan qarajatty qosa eseptegende, ekonomıkaǵa salynǵan ınvestıtsııalardyń jıyntyq kólemi $64 mlrd-tan asty.
Otyrys barysynda EADB keńesiniń Armenııa, Belarýs, Qyrǵyzstan, Reseı, Tájikstan jáne Ózbekstannan kelgen músheleri sóz sóıledi.
— EADB basqarma tóraǵasy Nıkolaı Podgýzov banktiń 2025 jylǵy qyzmetiniń nátıjeleri týraly baıandady. Onyń aıtýynsha, ótken jyldyń qorytyndysy boıynsha EADB ınvestıtsııalarynyń kólemi $2,6 mlrd-qa jetti. Qarjylandyrýdyń basym bóligi energetıka, kólik-logıstıka jáne hımııa ónerkásibi salalaryndaǵy jobalarǵa baǵyttalǵan. Banktiń «jasyl» jobalar portfeli bir jylda 17%-ǵa ósip, $1 mlrd-ty qurady. Sonymen qatar EADB-nyń Tehnıkalyq járdem qory men Tsıfrlyq bastamalar qory sý resýrstaryn únemdeý, jasandy ıntellekt tehnologııalaryn damytý isin jedeldetý, AÓK sektoryn damytý jáne basqa da jobalardy júzege asyrýǵa $40 mln kóleminde qarjy bóldi, — delingen habarlamada.
Banktiń qazirgi ınvestıtsııalyq portfelindegi Qazaqstannyń úlesi $4,2 mlrd nemese 65%-dy quraıdy. Qazirgi tańda banktiń qatysýymen elimizde 46 joba júzege asyrylýda.
Kún tártibindegi máselelerdiń biri EADB-nyń 2022-2026 jyldarǵa arnalǵan qoldanystaǵy strategııasynyń merziminen buryn oryndalýy boldy. Jyl sońyna qaraı EADB-nyń 2022-2026 strategııasy sheńberinde jınaqtalǵan ınvestıtsııalary josparlanǵan $10,9 mlrd-tan asyp, $12,2 mlrd deńgeıine jetedi dep kútilýde. 2022-2026 jyldar aralyǵynda Qazaqstan ekonomıkasyna $5,2 mlrd baǵyttaldy, bul kórsetkish aldyńǵy 15 jyl ishinde tartylǵan ınvestıtsııa kólemimen shamalas.
— Keńes otyrysynda EADB-nyń 2027-2031 jyldarǵa arnalǵan jańa damý strategııasy bekitildi. Qujatqa sáıkes, kólik-logıstıka keshenin damytý, joǵary qaıta bólý ónerkásibin qarjylandyrý jáne iri ınvestıtsııalyq jobalardy júzege asyrý úshin halyqaralyq kapıtal tartý basym baǵyttar retinde aıqyndaldy. Jalpy alǵanda, Strategııany júzege asyrý ekonomıkalyq kooperatsııany keńeıtý, ınvestıtsııalyq belsendilikti arttyrý jáne Bankke qatysýshy memleketterdiń turaqty ekonomıkalyq ósimine yqpal etedi, — dep habarlady Úkimetten.
Otyrys qorytyndysy boıynsha uıymdastyrýshylyq jáne qarjylyq sıpatta birqatar sheshim qabyldandy. Keńes músheleriniń usynysy boıynsha Qazaqstan Respýblıkasynyń Premer-mınıstri Oljas Bektenov qaıtadan EADB keńesiniń tóraǵasy bolyp saılandy, tóraǵanyń orynbasary bolyp QR qarjy mınıstri Mádı Takıev qaıta taǵaıyndaldy. Sondaı-aq Keńes 2026 qarjy jyly úshin syrtqy aýdıtor retinde KPMG kompanııasyn bekitti.
Sonymen qatar búgin Almatyda EADB-nyń 20 jyldyǵyna arnalǵan «Eýrazııa 2030+: ınvestıtsııalar, ósý jáne jańa múmkindikter» bıznes-forýmy ótýde. Forýmǵa qatysýshylarǵa EADB Dırektorlar keńesiniń tóraǵasy, Qazaqstan Premer-mınıstriniń alǵysózi oqyldy.
Alǵysózde qazirgi jaǵdaıda Eýrazııa naryǵynyń saýdany keńeıtý, tehnologııalardy engizý jáne ósýdiń jańa ekonomıkalyq núktelerin qalyptastyrý úshin aıtarlyqtaı áleýeti bar ekendigi atap ótildi. Osyǵan baılanysty EADB-nyń ekonomıkalyq yntymaqtastyqty nyǵaıtýdaǵy jáne óńirlik ıntegratsııany damytýǵa yqpal etetin iri ınfraqurylymdyq jobalardy júzege asyrýdaǵy erekshe róli aıtyldy. Bul rette aldaǵy jyldary Eýrazııanyń ornyqty ósýiniń negizi adamı kapıtalǵa salynǵan ınvestıtsııalar, ınnovatsııalar jáne ekonomıkalardyń ózara baılanysy bolady.
— Prezıdent Qasym-Jomart Kemeluly Toqaevtyń Ádiletti ári Progressıvti Qazaqstandy qurýǵa, zań ústemdigin nyǵaıtýǵa, kásipkerlikti damytýǵa jáne adamı áleýetti ashýǵa baǵyttalǵan strategııalyq bastamasy ınvestorlardyń senimine, ekonomıkany jańǵyrtýǵa jáne halyqaralyq áriptestikti keńeıtýge berik negiz qalyptastyrady. Búginde Qazaqstanmen yntymaqtastyq ınvestorlar úshin birlesken jobalardy júzege asyrýda úlken múmkindikter ashýda. Sheteldik ınvestıtsııalar úshin «ashyq esik» saıasaty eldiń strategııalyq basymdyǵy bolyp qala beredi. Onyń berik negizi menshik quqyǵynyń kepildikterin, kásipkerlik qyzmet erkindigin, adal básekelestik pen barlyǵynyń zań aldyndaǵy teńdigin bekitetin Qazaqstan Respýblıkasynyń jańa Konstıtýtsııasynyń erejeleri bolyp sanalady. Bul prıntsıpter ınvestorlar úshin mańyzdy ári bıznesti júrgizý, ınvestıtsııalardy qorǵaý jáne uzaqmerzimdi jobalardy júzege asyrý úshin jaǵdaılardy dáıekti túrde jaqsartýǵa múmkindik beredi, — delingen Oljas Bektenovtiń alǵysózinde.
Aıta keteıik, Oljas Bektenov «Jazǵy Davos» dúnıejúzilik ekonomıkalyq forýmyna qatysty.
