E. Ydyrysov QR SІM-degi áıel áriptesterin 8 naýryz merekesimen quttyqtady
ASTANA. QazAqparat - Qazaqstan Respýblıkasy Syrtqy ister mınıstri Erlan Ydyrysov 8 naýryz Halyqaralyq áıelder kúni merekesimen mınıstrliktiń áıelder qaýymyn quttyqtady, dep habarlaıdy vedomstvonyń baspasóz qyzmeti.
«Qurmetti hanymdar, Sizderdi kóktemniń alǵashqy merekesi - 8 naýryz Halyqaralyq áıelder kúnimen shyn júrekten quttyqtaımyn!
Ana qýanyshy, áıel qýanyshy - ár úıdiń, otbasynyń, Otannyń mereıi.
Bizdiń qazirgi ýaqytta áıel tek otbasynyń berekesin oılaıtyn tulǵa ǵana emes, ol memlekettiń ómirge jáne saıası máselelerge belsene aralasatyn qoǵam múshesi. Sondyqtan bizdiń elimizde áıel adamnyń áleýmettik qorǵalýyna aıryqsha mańyz beriledi.
Qymbatty hanymdar! Sizderdiń atyńyzǵa aıtylatyn aq alǵystar men jyly sózder esh ýaqytta tolastamasyn», dedi quttyqtaý sózinde Erlan Ydyrysov.
Mınıstr dıplomatııalyq qyzmettegi áıel qyzmetkerlerdiń er adamdarmen teń jemisti qyzmet isteıtindigin atap ótti.
«Elimizdiń Táýelsizdiginiń 25 jylynda áıel dıplomattar joǵary jetistikterge jetti. Atap aıtar bolsaq, egemendik alǵan tusta BUU-daǵy Qazaqstannyń ókili bolǵan bizdiń qurmetti ardagerimiz Aqmaral Arystanbekovanyń eńbegin erekshe atap ótkim keledi, sondaı-aq Italııa, Izraıl, Kýbada Qazaqstannyń Elshisi bolǵan, BUU janyndaǵy Qazaqstannyń turaqty ókili bolǵanda elimizdiń múddesin ilgerletýge zor úles qosqan belsendi Birǵanym Áıtimovany atyp ótýge bolady. Búgingi tańda ol QR Parlamenti Senatynyń Halyqaralyq qatynastar jónindegi komıtetinde jumysyn jalǵastyrýda», dedi QR Syrtqy ister mınıstri.
Erlan Ydyrysov budan basqa da Qazaqstannyń syrtqy saıasatynda tanymal, eńbek etip júrgen dıplomat áıelderdi atap ótti.
