E. Ydyrysov Qazaqstannyń syrtqy saıası baǵyty týraly ınternet qoldanýshylar suraqtaryna jaýap berdi
ASTANA. 30 qazan. QazAqparat - Keshe QR Syrtqy ister mınıstri Erlan Ydyrysov BNews.kz portalynyń stýdııasynda bolyp, «2050 - Strategııasy» aıasyndaǵy syrtqy saıası tapsyrmalardy júzege asyrý» taqyrybynda onlaın-konferentsııaǵa qatysty.
Bul týraly QR SІM baspasóz qyzmetinen habarlady.
SІM basshysy Qazaqstannyń syrtqy saıası baǵyty týraly ınternet qoldanýshylar suraqtaryna jaýap berip, QR Prezıdenti «2050 - Strategııasynda» alǵa qoıǵan tapsyrmalardy júzege asyrý barysymen tanystyrdy. AQSh, Reseı, Qytaı jáne basqa da Ortalyq Azııa elderimen qarym-qatynas taqyryby, Qazaqstannyń basqa memlekettermen halyqaralyq uıymdar sheńberindegi yntymaqtastyǵy keńinen ashyldy. E.Ydyrysov óziniń Latyn Amerıka elderine saparynda alǵan áserlerimen bólisip, sapardyń negizgi nátıjeleri jóninde, sonyń ishinde Argentına, Chılı jáne Brazılııa elderimen vızasyz kirip-shyǵý týraly kelisimderi týraly aıtyp berdi.
Sonymen qatar, syrtqy saıası vedomstvo basshysy transshekaralyq sýlar máselesin sheshýde Syrtqy ister mınıstrligi qabyldap otyrǵan sharalardy túsindirip, vızalyq máseleler men QR azamattarynyń shet elderde quqyqtaryn qorǵaý máselelerine erekshe nazar aýdardy.
