E.Ydyrysov qazaqstandyqtardyń Qyrymǵa baryp demalýyna qatysty oıyn bildirdi
ASTANA. QazAqparat - Astanada sońǵy kúni ótip jatqan HІІІ Eýrazııa medıa forýmyna qatysqan Qazaqstannyń Syrtqy ister mınıstri Erlan Ydyrysov jýrnalısterdiń suraǵyna jaýap bere otyryp, Qyrymdaǵy týrızmge qatysty pikirin bildirdi.
«Ýkraınanyń elshiligi men Reseıdiń elshiligi Qyrymdaǵy jazǵy demalys maýsymyna qatysty, bizdiń eldiń týrısterine qatysty pikirlerin aıtyp júrgenin men bilemin. Olardyń pikir almasqanyn kórip otyrmyz. Bul jerde bizdiń qoǵam abdyrap qaldy: ne isteý kerek? Bir jaǵynan, Reseı tarapy týrıster úshin bar jaǵdaı jasaımyz dep ýáde berip otyr. Ekinshi jaǵynan, Ýkraına taraby óz aýmaǵyna kirýge qatysty óz kózqarasyn aıtyp júr. Osylaısha, bizdiń eldiń aýmaǵy aqparattyq jarystyń alańyna aınalyp otyr. Bundaı jaǵdaıda týrısterge qandaı da bir keńes aıtý qıyn. Tek aıtarym, Qyrymnyń máselesi óte qıyn halyqaralyq másele, sondyqtan, bul máseleniń sheshimi halyqaralyq quqyq negizinde sheshilý kerek. ıAǵnı, bul máseleni sheshetin Qazaqstan emes. Bul shıelenisken jaǵdaıdy sheshetin basqa platformalar bar», - dep atap ótti E.Ydyrysov.
Qazaqstannyń Syrtqy ister mınıstri óz oıyn jalǵastyra kele Qyrymǵa qatysty Reseıdiń de, Ýkraınanyń da basshylyǵy qandaı pikir ustanyp otyrǵany belgili ekenin atap ótti.
«Sondyqtan, bul eki el halyqaralyq deńgeıde jaǵdaıdy retteý kerek. Al, qazaqstandyqtardyń Qyrymǵa baryp demalýyna qatysty aıtar bolsam, ár azamat ózi jeke sheshim qabyldaý kerek. Árbir qazaqstandyq bizge dos osy eki eldiń jaǵdaıyn ábden zerdelep, basqa demalys oryndaryn tańdasa da bolar edi. Al, eger de naqty Qyrymdy tańdasa, baryp-keler marshrýtyn erte jáne naqty anyqtap alý kerek», - dedi E.Ydyrysov.
