E.Ydyrysov «Qazaqstan sheteldik BAQ ókilderiniń kózimen» atty halyqaralyq baıqaý jeńimpazdaryn marapattady
ASTANA. Búgin QR Syrtqy ister mınıstri Erlan Ydyrysov «Qazaqstan sheteldik BAQ ókilderiniń kózimen» atty halyqaralyq baıqaý jeńimpazdarymen kezdesip, tıisti dıplomdaryn tabys etti.
Bul týraly syrtqy saıası vedomostvonyń baspasóz qyzmetinen habarlady.
Eske sala ketsek, 1-15 maýsym aralyǵynda Qazaqstan Jýrnalıster odaǵy QR Syrtqy ister mınıstrliginiń qoldaýymen sheteldik BAQ ókilderi arasynda Qazaqstan týraly eń úzdik basylymǵa halyqaralyq baıqaý ótkizgen bolatyn. Onyń basty júldesi Qazaqstanǵa kelip Astana, Almaty qalalaryn aralaý boldy. Baıqaý «Eır Astana» jáne «Rıksos Almaty» qonaq úıiniń demeýshiligimen uıymdastyryldy.
Baıqaý nátıjesinde bes adam, Belgııadan «Brussels Diplomatic» gazetiniń jýrnalısi Sıbıl Greındl (Sibylle Greindl), Gaıanadan «Kaieteur News» aqparattyq agenttiginiń jýrnalısi Nıl Marks (Neil Marks), Qatardan «The Peninsula Daily» gazetiniń bas redaktory Hýseın Ahmad (Hussain Ahmad), «Bernama» Malaızııa jetekshi aqparattyq agenttiginiń tilshisi Norshazlına Norazman (Norshazlina Norazman), sonymen qatar Ýkraınadan «Wellness» jýrnalynyń shef-redaktory Svetlana Ostrovskaıa jeńimpaz dep tanyldy.
E.Ydyrysov olardyń jumystarynyń joǵary sapalyǵy men jan-jaqtylyǵyna toqtala kelip, eskertkish dıplomdar tabys etti. Sonymen qatar sheteldik BAQ ókilderiniń atalmysh baıqaýǵa jáne jalpy Qazaqstanǵa degen joǵary qyzyǵýshylyǵyn atap ótti. Osy sharany uıymdastyrý barysynda álemniń 25 elinen 50-den asa basylym óz materıaldaryn joldady. Syrtqy saıası vedomstvo basshysynyń aıtýynsha, bul baıqaý endi jyl saıyn uıymdastyrylatyn bolady.
Marapattaýdan keıin sheteldik jýrnalıster úshin bolǵan brıfıngte E.Ydyrysov elimizdiń táýelsizdik jyldarynda qol jetkizgen negizgi áleýmettik-ekonomıkalyq jetistikteri, Memleket basshysy N.Nazarbaevtyń «Qazaqstan-2050» Strategııasyndaǵy maqsattar men tapsyrmalary týraly, sondaı-aq memlekettiń negizgi syrtqy saıası basymdyqtary jaıly baıandap berdi. Sondaı-aq, kezdesý barysynda Qazaqstannyń BUU Qaýipsizdik Keńesine 2017-2018 j.j. turaqty emes múshelikke enýi týraly usynysy, EKSPO-2017 halyqaralyq mamandandyrylǵan kórmesine daıyndyq máseleleri, Latyn Amerıkasy jáne Azııa elderimen qarym-qatynas, Qazaqstannyń memleket ishinde ultaralyq tatýlyq pen kelisimdi ornatý men nyǵaıtý, Ýkraınadaǵy qaqtyǵysty retteýge kórsetken yqpaly sekildi máseleler de qozǵaldy.
