E.Ydyrysov: Qazaqstan básekege qabiletti, ashyq jáne ádil saılaý ótkizý prıntsıpterin ustanady (FOTO)
ASTANA. QazAqparat - Qazaqstan básekege qabiletti, ashyq jáne ádil saılaý ótkizý prıntsıpterin ustanady, dedi Qazaqstan Syrtqy ister mınıstri Erlan Ydyrysov Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar jáne adam quqyǵy jónindegi bıýro mıssııasynyń basshysy Borıs Frletspen bolǵan kezdesýde. Jıynda 20 naýryzynda ótetin parlament saılaýyna qatysty máseleler talqylandy.
«Aldaǵy parlament saılaýy el táýelsizdigin nyǵaıtý jolyndaǵy kezekti qadam bolaryna senemin. Saılaýdy joǵary demokratııalyq standarttar negizinde uıymdastyryp, qoǵamnyń 100% senimin qamtamasyz etýge nıettimiz. Úmitkerlerge qoıylatyn talaptar men saılaýdy ótkizý erejeleri Konstıtýtsııamyz ben saılaý zańnamasynda jazylǵan», - dedi vedomstvo basshysy.
Sonymen qatar, E.Ydyrysov saılaýǵa 11 halyqaralyq uıymnan halyqaralyq baıqaýshylar jáne 19 eldiń ortalyq saılaý komıtetiniń ókilderi shaqyrtylǵanyn atap ótti.
Óz kezeginde, B. Frlets elimizdegi saılaýdy baqylaýǵa ýaqytynda shaqyrǵany jáne mıssııanyń jumysy úshin qolaıly jaǵdaı jasaǵany úshin alǵys bildirdi. EQYU DAQB mıssııasy Parlament Májilisi depýtattarynyń saılaýyn baqylaýǵa resmı túrde 17 aqpanda kiristi.
Kezdesý sońynda taraptar aldaǵy kezeńde syndarly jáne tyǵyz yqpaldastyqqa daıyn ekenin rastady.
