E.Ydyrysov dıplomatııalyq qyzmetindegi qyzyqty oqıǵalarmen bólisti

«Kúlkili oqıǵalar óte kóp bolady. Mynadaı bir qyzyqty jaıt esimde. 2001 jyly Qazaqstanǵa Rım papasy keldi. Bul zor mártebe boldy. Ol 5 kún boldy jáne onyń baǵdarlamasy da barynsha tyǵyz edi. Rım papasy jastarmen áńgimelesken óte jaqsy kóretin. Sondyqtan da baǵdarlamada onyń L.Gýmılev atyndaǵy Eýrazııa ulttyq ýnıversıtetinde sóz sóıleýi josparlandy.

Ózimizdiń qazaqy dástúrimizge saı qarsy aldyq, mýzyka oınalyp, bı bılendi. Bizdiń qyzdarymyz bı bılep bolǵannan keıin Rım papasyna jaqyndap onyń betinen súıdi. Rım papasy din kóshbasshysy bolǵandyqtan qolyn usynýy qalyptasqan. Degenmen, bul jaıt zalda kúlki týdyrdy. Rım papasyna qazaqstandyq qyzdardyń bulaı qurmet kórsetý unady», - dedi ol.

Sonymen qatar, mınıstr QR Prezıdentiniń Izraılge sapary barysynda oryn alǵan qyzyqty oqıǵalardyń birinde aıtyp berdi.

«Biz áýejaıdan shyǵyp bara jatqan kezde ızraıldik kúzetshilerdiń sózin estip qaldym. Olar qatty alańdap, bir nárseni qyzý talqylap jatty. Men olardan aqyryn ǵana ne bolyp jatqanyn suradym. Sóıtsem, qonaq úı aldyna qoldarynda transparant bar bir top adam jınalyp qalypty. Kúzetshiler men polıtsııa qyzmetkerleri muny bizdiń Prezıdenttiń kelýine baılanysty qandaı da bir sherý dep oılapty. Biz qonaq úıge keldik. Anyǵyn bilsek, olar Qazaqstanda dúnıege kelgen Izraıl azamattary eken. Olar shamamen 300 nemese 500 adam boldy. Barlyǵy da QR Prezıdentin zor qoshemetpen qarsy alyp, Qazaqstanda turǵan kezde kórgen jaqsylyqtary úshin alǵystaryn bildirdi», - dedi E.Ydyrysov.