E-úkimettiń portaly arqyly 4 mln.-nan astam qyzmet kórsetilgen
ASTANA. 16 tamyz. QazAqparat - Zamanaýı aqparattyq-kommýnıkatsııalyq tehnologııany qoldaný arqyly elektrondyq úkimetti damytý memlekettik qyzmetti ońtaılandyrýǵa, sapasyn arttyrýǵa jáne qoljetimdiligine baǵyttalǵan.
2012 jyldyń І jartyjyldyǵynda e-úkimettiń portaly arqyly halyqqa 4 mln.-nan astam qyzmet túri kórsetilgen, dep habarlaıdy Pm.kz saıty.
«2012 jyldyń sońyna deıin áleýmettik mańyzy bar memlekettik qyzmetterdiń 60 paıyzy, onyń ishinde lıtsenzııanyń barlyq túri - tek elektrondy formada ǵana kórsetilýi qajet», - dep tapsyrdy QR Prezıdenti N.Á.Nazarbaev «Áleýmettik-ekonomıkalyq jańǵyrtý - Qazaqstandy damytýdyń basty baǵyty» atty Qazaqstan halqyna arnaǵan Joldaýynda.»
Kólik jáne kommýnıkatsııa mınıstrliginiń málimetterine qaraǵanda, e-úkimettiń ınfraqurylymy sheńberinde jeke jáne zańdy tulǵalarǵa 236 ınteraktıvti jáne tranzaktsııalyq qyzmetter kórsetiledi. Olardyń 108-i e-lıtsenzııalaýdyń (www.elicense.kz) málimetter bazasy arqyly jáne 128-i www.egov.kz portalynda kórsetiledi.
Aqparatta habarlanǵandaı, elektrondyq úkimette kórsetiletin qyzmetter qataryna 67 qyzmet, 16 servıs, 21 túrli memlekettik alym, 16 túrli memlekettik baj salyǵy, 4 túrli salyqtyq tólemderdi tóleý, sondaı-aq jol júrý erejesin buzǵany úshin tólemder jáne kommýnaldyq qyzmettik 3 túri enedi. Budan basqa portalda aqparattyq sıpattaǵy qyzmetter de kórsetiledi.
Júrgizilip jatqan sharalardyń tıimdiligin 2012 jyldyń І jartyjyldyǵyndaǵy statıstıkalyq málimetter de rastaıdy. QR KKM málimetterine qaraǵanda, portalǵa tirkelgen paıdalanýshylardyń sany 56 666 adamǵa jetken, bul 2011 jylǵy osy ýaqytpen salystyrǵanda 7980 adamǵa kóp.
Kórsetilgen qyzmet sany 4 060 328 birlikti quraıdy, bul ótken jylǵy deńgeıden 571 838 birlikke joǵary. Sondaı-aq, ústimizdegi jyldyń qańtar-maýsym aılarynda 150 878 elektrondyq sandyq qol berilgen, bul 2011 jylǵy osy ýaqytqa qaraǵanda 4838 birlikke artyq.
Budan basqa, jarty jyl ishinde e-úkimettiń tólem shlıýzi arqyly ótkizilgen tranzaktsııa sany 8119 quraǵan, bul ótken jylǵa qaraǵanda 7192 artyq, tranzaktsııa somasy - 31 656 573 teńge.
Esterińizge sala keteıik, BUU bıylǵy reıtıngisi boıynsha Qazaqstan «e-qatysý» ındeksi boıynsha uıymǵa qatysýshy 190 eldiń ishinde ІІ oryn alǵan, al elektrondyq úkimetti damytý ındeksi boıynsha 2005 jylǵy 65 orynnan 38 orynǵa kóterilgen.
