E. Toǵjanov: Jýrnalısterdi medıator dep aıtamyn (FOTO)

ASTANA. QazAqparat - Jýrnalısterdiń árqaısysyn medıator dep aıta alamyn. Búgin QHA Jýrnalıster klýbynyń keńeıtilgen otyrysynda Qazaqstan halqy Assambleıasy Tóraǵasynyń orynbasary - Hatshylyq meńgerýshisi Eraly Toǵjanov málim etti.

«Bıylǵy jyldyń ereksheligi Táýelsizdigimizdiń 25 jyldyǵymen tikeleı baılanysty. Sondyqtan birliktiń qundylyqtary - Táýelsizdikti qamtamasyz etýdiń negizgi kepili. Jalpy, QHA sessııasynda bergen Elbasynyń biraz tapsyrmalary bar. Onyń ishinde  «qoǵamdyq kelisim» ıdeıasyna baılanysty arnaıy keńesterdiń qurylýy qamtylǵan, ıaǵnı úsh jyldan beri jumystar atqarylýda, biraq qoǵamdyq ortada bul baǵyttaǵy jumystarǵa birge tartýymyz kerek. Jýrnalıster qaýymyn qoǵamdyq keńestiń jumysyna belsendi aralasýǵa shaqyramyn. Búginde osyndaı 1932 arnaıy keńester oblystardan bastap, aýdandarǵa deıin jáne aýyldyq jerlerde quryldy. Sondyqtan elimizdiń búkil tynysy men tirshiligin sizdermen birge qarastyrý kerek dep oılaımyn», - dedi E. Toǵjanov.

Budan bólek, ol medıatsııa baǵytyndaǵy jumystarǵa toqtaldy. «Jýrnalısterdiń árqaısysyn medıator dep aıtsam, artyq bolmaıdy. Búginde biz Joǵarǵy sotpen arnaıy memorandým daıyndap jatyrmyz, qujattyń jobasy aıaqtalýǵa jaqyn. Árbir adam óziniń ómirinde sot júıesinde azamattyq, ákimshilik nemese basqa da ister aıasynda aralasyp turatyny anyq. Eger sol máselelerdi  sotqa jetkizbeı, sizderdiń qatysýyńyzben birge sheship otyratyn bolsaq, bul bizdiń úlken jeńisimizdiń biri bolady. Sheteldiń taldaý jumystaryna qarasaq, sotqa deıingi máselelerdiń 70 paıyzǵa deıingi kórsetkishi medıatsııa alańdarynda sheshilýde. Bul rette qarjynyń, ýaqyttyń únemdelýin atap ótýge bolady», - dedi Hatshylyq meńgerýshisi.