E.Tileshov: Tilder festıvalin Ahmet Baıtursynovtyń týǵan kúnine oraılastyrýymyz - zańdylyq

ASTANA. QazAqparat - Tilder festıvalin myńdaǵan jyldyq tarıhy bar tilimizdi ǵylymı júıege túsirip, «ult ustazy» atanǵan Ahmet Baıtursynovtyń týǵan kúnine oraılastyrýymyz - zańdylyq. Bul týraly búgin Astanadaǵy Ulttyq sýret galereıasynda ótken Qazaqstan halqy tilderiniń XVI qalalyq festıvaliniń ashylý saltanatynda Astana qalasy tilderdi damytý basqarmasynyń basshysy Erbol Tileshov aıtty.

«Elimizde Abaıdyń týǵan kúnin barlyǵy jaqsy biledi. Keńes odaǵy kezinen beri tamyzda Abaı atamyzdyń týǵan kúni keń kólemde atalyp ótedi. Sondyqtan 5 qyrkúıek - ult ustazy Ahańnyń týǵan kúnin de osyndaı deńgeıge jetkizý maqsatynda jumys istep jatyrmyz. Sonyń biri - Tilder festıvalin osy kúnge oraılastyrý. Bul festıval aıasynda kóptegen sharalar uıymdastyrylyp, ol 9 qyrkúıekke deıin óz jalǵasyn tabady», - dep atap ótti E. Tileshov.

Onyń aıtýynsha, festıvaldiń maqsaty - memlekettik tildiń mártebesin, qoǵamdaǵy rólin arttyrý, qoldanys aıasyn keńeıtý, ulttyq qundylyqtardy nasıhattaý. Sharanyń ashylý saltanatynda Q.Qýanyshbaev atyndaǵy Memlekettik akademııalyq qazaq mýzykalyq drama teatry ártisteriniń qatysýymen qoıylymdar kórsetilip, Qazaqstannyń tanymal ánshileri Baýyrjan Isaev, Marjan Arapbaeva, Jańabaı Ótegen jáne t.b. óz ónerlerin kórsetti. Sonymen qatar «Naz» bı teatrynyń bıshileri qazaqtyń kórkem bılerin tartý etti. Belgili aıtysker aqyndar Balǵynbek Imashev pen Ásem Erejepqyzy aıtysyp, ult, til, el rýhanııatynyń kókeıkesti máselelerin jyrǵa arqaý etti.