E.Sultanov: aýdan ákimderi erikti órt jasaqtaryn qaǵaz júzinde emes, is júzinde qurýy qajet
ASTANA. QazAqparat - Soltústik Qazaqstan oblysynyń ákimi Erik Sultanov orman órtteriniń aldyn alý men olarǵa qarsy kúres jáne óńirdegi avtojoldardy jóndeý jaıy qaralǵan jıynǵa qatysty. Bul týraly ákimdiktiń baspasóz qyzmeti habarlady.
Oblystaǵy orman qorynyń jalpy aýdany 549 myń gektardy qamtıdy. Ony qorǵaýǵa 578 memlekettik orman qorǵaý qyzmetkeri jumyldyrylǵan.
Ótken jyly oblys aýmaǵynda 4 orman órti men ormanǵa irgeles jerde 124 ot tutaný tirkeldi. Taldaý órt shyǵýyna ormanǵa jaqyn egistikterdiń 4 metrlik jyrtylǵan jeriniń bolmaýy jáne ańyz qaldyqtaryn baqylaýsyz órtteý sebep bolatynyn kórsetti.
Tabıǵı resýrstar jáne tabıǵat paıdalanýdy retteý basqarmasy basshysynyń orynbasary Anatolıı Ýsoltsev 10 sáýir bastalatyn órt týyndaý qaýpi bar maýsymǵa daıyndyq týraly baıandady.
«Aldaǵy órt qaýpi bar kezeńde tutanýdy joıý úshin memlekettik orman mekemeleri 16 orman órt stansasyn, 16 órt kóligin, 76 topyraq óńdeıtin jabdyq tirkelgen traktordy retke keltirdi», - dedi ol.
Erik Sultanov ár aýdandaǵy erikti órt jasaqtary jumysynyń tıimdiligine kóńil bóldi.
«Aýdan ákimderi erikti órt jasaqtaryn qaǵaz júzinde emes, is júzinde qurýy qajet. Ormandy baqylaýsyz ot qoıatyndarǵa qatysty qatań shara qoldaný qajet. Jumysty bir aı ishinde ótkizý qajet», - dep tapsyrdy oblys ákimi.
