E-sport ulttyq sport tuǵyrnamasyn engizýdiń mán-jaıy belgili boldy
«Keshendi josparda e-sport tsıfrlyq tuǵyrnamasyn engizý kózdelgen. Bul turǵyda sport salasyn tsıfrlandyrý úshin biregeı múmkindik bar. E-sport tuǵyrnamasy arqyly sport kúntizbeleri, biryńǵaı sporttyq klassıfıkatsııa, qurama komandalardyń quramdary, sportshylar men jattyqtyrýshylardyń, tóreshilerdiń biryńǵaı elektrondy bazasy jáne basqa da negizgi qujattar jalpyǵa qoljetimdi bolady» , - dedi mınıstr Ortalyq kommýnıkatsııalar qyzmetindegi onlaın baspasóz máslıhatynda.
Onyń sózine qaraǵanda, e-sport tuǵyrnamasyn mınıstrlik Ulttyq aqparattyq tehnologııalar aktsıonerlik qoǵamymen birlesip ázirlep, 2020 jyldyń sońyna deıin elimizdiń óńirleriniń birinde qanatqaqty joba retinde synaqtan ótkizip, iske qosýdy qarastyrýda.
Óz kezeginde QR MSM Sport jáne dene shynyqtyrý isteri komıteti tóraǵasynyń orynbasary Asqar Esimov ulttyq tsıfrlyq tuǵyrnama keshendi jospardy iske asyrý boıynsha mańyzdy baǵyttardyń biri ekenin atap ótti.
Tsıfrlyq tuǵyrnama úsh modýldi qamtyp otyr. Birinshisi - sporttyq sharalardy basqarýǵa arnalǵan, ıaǵnı sporttyq kúntizbe tolyqtaı tsıfrlandyrýdan ótedi.
Ekinshi modýl sportshylardyń, tóreshilerdiń, bapkerlerdiń pasporttaryn engizýdi, sondaı-aq barlyq memlekettik qyzmetti elektrondy formatta usynýdy eskerip otyr.
Úshinshi modýl aıasynda sporttyq nysandar tsıfrlandyrý sharalarymen qamtylyp, sektsııalar týraly barsha aqparat turǵyndarǵa usynylady. Osy oraıda bul júıe turǵyndar tarapynan qoıylatyn barlyq suraqtarǵa jaýap beredi.
Aıta keteıik, Dene shynyqtyrý jáne buqaralyq sportty damytý jónindegi 2020-2025 jylǵa arnalǵan keshendi jospary ázirlendi. Bul josparda múddeli memlekettik organdardyń, jergilikti atqarýshy organdardyń usynystary tolyq eskerilip, QR Premer-Mınıstrimen bekitildi.
