«E-sport» elektrondyq júıesi engiziledi
ASTANA. KAZINFORM – «E-sport» elektrondyq júıesi engiziledi. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Sportqa bólingen qarajatty tıimdi ıgerý úshin «E-sport» elektrondyq júıesin engizý jumystary júrgizilip jatyr. Júıe sporttyq is-sharalardy josparlaý, qarjylandyrý, ulttyq quramalardy jasaqtaý jáne sporttyq ataqtar berý jumystaryn tsıfrlandyrýǵa múmkindik beredi», - dedi Oljas Bektenov.
Sonymen qatar Premer-Mınıstr Májilis depýtattarynyń álemdegi úzdik damyǵan sport ınstıtýttaryn nazarǵa ala otyryp, sportshylardy oqytýdy ǵylymı qamtamasyz etýdiń táýelsiz ınstıtýtyn qurý usynysynyń oryndy ekendigin atap ótedi.
«Memleket basshysynyń tapsyrmasymen Astana qalasynda ulttyq ýnıversıtettiń qurylysy júrgizilip jatyr. Ýnıversıtet qurylysy 2025 jyldyń sońyna deıin aıaqtalyp, onyń bazasynda jattyqtyrýshylardy, nusqaýshylardy jáne sport dárigerlerin daıyndaıtyn táýelsiz ǵylymı ınstıtýt qurý josparlanyp otyr. Jańa zań jobasy («Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý, sondaı-aq normalardyń artyq (shamadan tys) zańnamalyq reglamenttelýin boldyrmaý týraly» zań jobasy) kúshine engennen keıin 2023-2029 jyldarǵa arnalǵan dene shynyqtyrý men sportty damytý tujyrymdasyna ózgerister engizilip, is-sharalar jospary bekitiletin bolady. Bul jospar sporttyń damýyn naqty kórsetkishter arqyly baǵalaýǵa múmkindik beredi»,- dedi Úkimet basshysy.
Aıta keteıik, elimizde sport salasynda tikeleı biriktirilgen basqarý júıesi engizilmek.
