E.Snoýden Washington Post gazetine AQSh arnaıy qyzmetiniń «kóleńkeli bıýdjeti» týraly qupııa málimetter berdi
ASTANA. 31 tamyz. QazAqparat - Amerıka arnaıy qyzmetiniń burynǵy qyzmetkeri Edvard Snoýden Washington Post gazetine AQSh arnaıy qyzmetiniń birneshe mıllıon dollarlyq «kóleńkeli bıýdjeti» týraly qupııa málimetter berdi. Bul týraly Bı-Bı-SI habarlady.
Atalǵan aqparatqa sáıkes, Ortalyq barlaý qyzmetiniń bıýdjeti bárinen de kóp, ol 14,7 mlrd. dollardy quraıdy. Al, jalpy 16 barlaý vedomstvosyna jyl saıyn 52,6 mlrd. dollar shyǵyndalady.
Bıýdjeti boıynsha 2-shi orynda AQSh-tyń Ulttyq qaýipsizdik agenttigi tur. Onyń aǵymdaǵy jyly shyǵyny 10,8 mlrd. dollarǵa teń.
Washington Post basylymnyń jazýyna qaraǵanda, 2004 jyldan bergi ýaqytta Ortalyq barlaý qyzmetiniń bıýdjeti 50 paıyzdan astamǵa ulǵaıǵan. Agentterdi paıdalaný arqyly júzege asyrylatyn operatsııalarǵa jylyna shamamen 5 mlrd. dollar bólinedi. Onyń 67 mln. dollary shekaradan tysqary jerlerde shpıondardyń jalǵan qujattarmen jumys isteýin qamtamasyz etýge jumsalady.
