E. Snoýden ózin Máskeýdiń jansyzy degen aıyptaýdy joqqa shyǵardy
ASTANA. 22 qańtar. QazAqparat - AQSh-tyń Ulttyq qaýipsizdik agenttiginiń burynǵy qyzmetkeri Edvard Snoýden amerıkalyq New Yorker jýrnalyna bergen suhbatynda óziniń reseılik tyńshy emes ekenin atap ótti.
Sonymen qatar AQSh-taǵy keıbir laýazym ıeleriniń ony reseılik tyńshy degen aıyptaýlaryn shyndyqqa janaspaıtynyn jetkizdi. Bul týraly sheteldik BAQ habarlady.
Osy oraıda E. Snoýden «is-áreketterin eshkimniń kómeginsiz jalǵyz atqarǵandyǵyn» alǵa tartýda.
Ol Reseıdiń jansyzy emestigi týraly dáleldemelerin aıta kele, aldymen Gonkongke barǵanyn, tek sodan keıin ǵana Sheremetevo áýejaıynda tutylyp qalǵanyn sóz etti.
Edvard Snoýden 2013 jyldyń mamyrynda AQSh-tan qashqanǵa deıin Reseıge jumys isteýi múmkin degen boljamdy amerıkalyq kongrestiń barlaý boıynsha ókilder komıtetiniń tóraǵasy Maık Rodjers aıtqan bolatyn. Alaıda óziniń osy pikirinde Rodjers dáıekti derekterdi keltire almady.
Budan bólek, Senattyń barlaý boıynsha komıtetin basqaryp otyrǵan senator Daıan Faınstaın burynǵy agent Snoýden Reseı tarapynan kómek alýy múmkin dep málimdegen edi, biraq ta bul týraly ázirge esh aıǵaqtar joq.
Óz kezeginde Federaldy tergeý bıýrosy Snoýden is-qımyldardyń barlyǵyn ózi jalǵyz júzege asyrdy dep paıymdap otyr.
