E.Snoýden amerıkandyq «Baspasóz bostandyǵy qory» ÚEU Dırektorlar keńesiniń quramyna kirmek
ASTANA. 15 qańtar. QazAqparat - Osydan bir jyl buryn AQSh-ta qurylǵan «Baspasóz bostandyǵy qory» úkimettik emes uıymy Amerıka arnaıy qyzmetiniń burynǵy qyzmetkeri Edvard Snoýdendi Dırektorlar keńesine shaqyrdy,
dep habarlaıdy Reseıdiń «Jańalyqtar» aqparat agenttigi.
«Baspasóz bostandyǵy qory» 2012 jyldyń jeltoqsan aıynda qoǵamnyń qyzyǵýshylyǵyn týyndatatyn aqparattardyń ashyq bolýyna umtylatyn jýrnalısterge qoldaý kórsetý ári qorǵaý maqsatynda qurylǵan bolatyn. Qor Dırektorlar keńesiniń quramyna 1960 jyldary Vetnamǵa qatysty Pentagon qujattarynyń jarııa etilýin uıymdastyrǵan AQSh Qorǵanys mınıstriniń burynǵy kómekshisi Denıel Ellsberg, amerıkandyq kınoakter Djon Kıýsak jáne Snoýden aqparattaryn jarııalaý arqyly tanymaldylyǵy artqan brıtandyq Guardian gazetiniń kolýmnısi Glenn Grınvald kirdi.
Aıta keterligi, uıym jumys istegen ýaqyttan beri aty shýly WikiLeaks saıtyna qoldaý kórsetýge 0,5 mıllıon dollardan astam qarjy jınady.
Edvard Snoýden ótken jyldyń maýsym aıynda AQSh arnaıy qyzmetiniń túrli elderdegi azamattardyń ınternettegi jáne telefondaǵy baılanystaryn jasyryn tyńdaıtyn qupııa baǵdarlamasyn jurtshylyqqa jarııa etken bolatyn. Baǵdarlama halyqaralyq deńgeıde daý týdyryp, AQSh-tyń odaqtastary da oǵan narazylyqtaryn bildirgen edi. Sol jyldyń tamyzynda ol Reseıden bir jylǵa ýaqytsha saıası baspana aldy.
