E.Shymyrqulovtyń shymyrlyǵy arqasynda kisi tonaýshy qolǵa tústi
ORAL. QazAqparat - QR Ulttyq ulany kelisim-sharttyq qyzmetiniń áskerı qyzmetkeri Eldos Shymyrqulov jýyrda kisi tonaýshyny qybyr etkizbedi.
«Batys» óńirlik qolbasshylyǵynyń baspasóz qyzmetinen habarlaǵanyndaı, Aqtaý garnızony áskerı prokýratýrasynan shyqqan Eldos janynan júgirip ótken azııalyq pishindegi er adamdy kórip, odan keıin kómek suraǵan áıeldiń aıqaıyn estıdi. Sol boıda «Toqta!» degenine qaırylmaǵan kúdiktini qýyp jetken jaýynger qoıan-qoltyq urys tásilin qoldanyp, tergeý-jedel tobyn shaqyrady.
Keıin kúdiktiniń uıaly telefondy jymqyrǵany belgili boldy.
Taǵy bir osyndaı oqıǵa Jańaózen qalasynda oryn aldy. «Órken» shaǵynaýdanynda qoǵamdyq tártip kúzetinde júrgen 5548-áskerı bóliminiń qatardaǵy jaýyngerleri Asanáli Serǵazynov, Rýslan Tilespaev, Saıat Dúısenbekov №67 úı janynan araq iship otyrǵan eki er adamdy kóredi. Kúzet bastyǵy A.Serǵazynov atalǵan azamattardyń qujatyn suraǵanda, «Joq» degen jaýap estıdi. Onyń ústine bireýi qaltasynan bir nárse alyp, alaqanyna qysyp, ekinshi qolymen bos bótelkeni sermeleıdi. Sosyn qashyp ketpekshi bolady. Aqyry er adamnyń birinen jasyl tústes, esirtkige uqsas ısi bar zat tabylady. Budan keıin quqyq buzýshylar qalalyq ishki ister basqarmasyna jetkizildi.
Qyraǵylyǵy men batyl qımyly úshin atalǵan jaýyngerler áskerı bólim basshylyǵy tarapynan alǵysqa ıe boldy.
