E. Shlek jańa komanda qurmasa, «Astana» veloklýbyna aýysyp kelýi múmkin - Q. Kelimbetov
ASTANA. Qyrkúıektiń 17-si. QazAqparat /Jasulan Amanbaıuly/ - «Astana» veloklýbynyń basshylyǵy Saxo Bank shabandozy lıýksembýrgtyq Endı Shlekti komandaǵa tartýdy josparlaýda.
Bul týraly búgin elordada jýrnalıstermen kezdesken Qazaqstannyń velosport qaýymdastyǵynyń prezıdenti, «Samuryq-Qazyna» UÁQ» AQ basshysy Qaırat Kelimbetov aıtty.
«Kelissózder jóninde aıtar bolsaq, olar júrip jatyr. Biraq sizder bilesizder, jaqynda ótken Týr de Frans jarysynan keıin, Endı Shlek óziniń aǵasymen birge jańa komandany jasaqtaý josparyn jarııa etti. Ol qazir basqa federatsııalardan túsken usynystardy qarap jatqan joq. Degenmen biz óz usynysymyzdy jasadyq jáne olardan eger jańa komandany qurý jospary júzege aspaıtyn bolsa, bizdiń usynysymyz birinshi bolyp qaralatyny jóninde jaýap-hat tústi», dedi Q. Kelimbetov.
Kelesi jyly Astana sapynda Alberto Kontador bolmasa da, qazaqstandyq komanda aldaryna aýqymdy mindetter qoıyp otyr. Qazirgi ýaqytta komandanyń sapyn kúsheıtý sharalary aıaqtalyp qaldy. Liquigas komandasynyń burynǵy sportshysy Roman Kroıtsıger «Astana» komandasyna aýysty. Ol «Astanany» iri týrnırlerde jeńiske jeteleıdi degen úmit basym.
«Vınokýrovtyń janynda aǵaly-inili Shlekter bolsa da, Roman Kroıtsıger bolsa da, kelesi jyly «Astana» Alberto Kontadordyń komandasyna joıqyn básekelestik jasaı alatyn bolady», deıdi Q. Kelimbetov.
Bolashaqta qazaqstandyq komanda jekeleı esepte Djıro d'Italııa jarysyn, al toptyq esep boıynsha Týr de Fransty jeńip alý maqsatyn qoıyp otyr.
Qazirgi ýaqytta «Astana» klýby Djıro d'Italııa týrnıriniń kezeńinde jeńimpaz atanǵan reseılik Evgenıı Petrovpen jáne slovenııalyq Robert Kıserlovskımen kelisim jasady. Sondaı-aq Tanel Kangert pen ıtalıandyq sportshy Franchesko Maskıarellı klýbpen bir jylǵa kelisimge otyrdy.
