E.Saıyrov: Prezıdent saılaýy elimizdegi saıası menedjmenttiń óte joǵary ekenin pash etti
ASTANA. QazAqparat - Prezıdent saılaýy elimizdegi saıası menedjmenttiń óte joǵary ekenin pash etti. Bul pikirdi búgin «Amanat» ıntellektýaldy pikir-saıys klýbynyń kezekti otyrysy aıasynda BAQ ókilderine suhbat bergen saıasattanýshy Erlan Saıyrov bildirdi.
«Saılaý óte joǵary deńgeıde ótti. Men ózim Aqmola oblysynyń keıbir aýyldarynda boldym. Sonda daýys berý barysy saltanatty reńkke ıe bolǵanyn kórdim. Bul bizdiń elimizdegi saıası menedjmenttiń óte joǵary deńgeıde ekendigin kórsetedi. Osy saıası menedjmenttiń joǵary bolýy halqymyzdyń, Qazaqstan qoǵamynyń saıası mádenıetiniń belgili bir dárejege óskenin baıqatady», - dedi ol.
Sonymen qatar ol 26 sáýir kúni ótken QR Prezıdentiniń kezekten tys saılaýy Qazaqstanda bolashaqta bolatyn oń ózgeristerdiń emtıhany dep sanaıtyndyǵyn basa aıtty.
«Daýys berý kúngi qazaqstandyqtardyń taıly-taıaǵy qalmaı saılaý ýchaskelerine aǵylýynda esh jasandylyq joq. Buǵan qosa, men áleýmettik jelilerdi de jiti baqylap otyrdym. Eger, saılaýdyń aldynda 1-2 aı buryn halyqta pessımızm basym bolsa, dál saılaý kúni áleýmettik jelilerdiń basym bóligi ózderiniń saılaýǵa barǵanyn, daýys bergenin jarııa etti. ıAǵnı, daýys berý optımızm jaǵdaıynda ótti», - dedi E.Saıyrov.
