E. Saǵadıev: Mektepterdegi eksperımentterdiń barlyǵy aıaqtalǵanyn resmı túrde málim etemin
ASTANA. QazAqparat - QR Bilim jáne ǵylym mınıstri Erlan Saǵadıev bilim salasynda atqarǵan jumystary úshin burynǵy mınıstrge alǵysyn aıtty. Bul týraly búgin Astanadaǵy L.N.Gýmılev atyndaǵy Eýrazııa ulttyq ýnıversıtetindegi halyqpen esepti kezdesýinde málim etti.
Jańartylǵan baǵdarlamany engizýge mektepterde aýqymdy daıyndyq jumystary júrgenine toqtalǵan ol, alty jylda jańartylǵan mazmunnyń modeli 20 Nazarbaev zııatkerlik mektepterinde aprobatsııadan ótkendigin aıtyp ótti.
«100-den astam mektep osy jyldary eksperımentte boldy, 10 myńnan atam bala jańartylǵan baǵdarlamamen bilim aldy jáne qazirgi kezde oqyp jatyr. Olardyń kóbisi mektepti, ýnıversıtetti támamdady, al keıbiri búginde qyzmetke turdy. Baǵdarlamaǵa balalardyń, ata-analardyń jáne múǵalimderdiń kóńili tolyp otyr. Jalpy, Prezıdenttiń tapyrmasy boıynsha, jumystar 15 jyldan astam ýaqyt buryn bastaldy. Sondyqtan da, bizdiń daıar ekendigimizge senimdi bolý úshin 15 jyl jetkilikti merzim dep paıymdaımyz. Osy rette ekperımentterdiń barlyǵy aıaqtaldy dep resmı túrde málim etkim keledi»,-dedi E. Saǵadıev.
«Bilim salasynda tereń ári nátıjeli jumysty atqarǵan burynǵy mınıstrge, eń aldymen áriptesterime jáne jalpy ǵylym men halyq aǵartý salasynda qyzmet etip júrgen qaýymǵa rahmetimizdi aıtamyz. Endi jańadan bekitilgen tórt jyldyq Bilim jáne ǵylymdy damytý memlekettik baǵdarlamasyna toqtalatyn bolsaq, jańa baǵdarlama Prezıdenttiń «100 naqty qadam» Ult jospary, onyń jeke mańyzdy tapsyrmalarynyń negizinde jasalyndy. Qujatta osy salanyń álemdegi damý baǵyttary eskerilgen, jańa damý strategııasynyń alty úlken mańyzdy baǵyty bar», - dep toqtaldy mınıstr.
Osy rette eń birinshisi - bilim beretin ınfraqurylym qamtylǵan. «Qazirgi ýaqytta mektepter salý máselesi kóterilip jatyr, ony «Nurly jol» arqyly sheshýge tyrysamyz. Ákimdikter de kómektesedi, ıaǵnı mektepter salynatyn bolady»,-dedi B. Saǵadıev.
Ekinshiden, úsh tildilikti engizý men damytý. Úshinshiden, 12 jyldyq oqytý júıesine kezeń-kezeńmen kóshý; tórtinshiden, jekemenshik jáne memlekettik sektordyń arasyndaǵy sharttardy teńestirý, jan basyna qarjylandyrý júıesine kóshý; besinshiden, bilim uıymdarynyń qarjy sharýashylyq qyzmetiniń ashyqtyǵyn qamtamasyz etý; altynshy: ǵylym salasyn jekemenshik kompanııalarmen qosa qarjylandyrý jolyna kóshý.
