Konstıtýtsııa reformasy: «E-Ótinishke» túsken usynystar sany 4 myńnan asty

ASTANA. KAZINFORM — Prezıdent janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov jańa Konstıtýtsııanyń jobasy jarııalanǵannan beri Ata zań aınalasyndaǵy pikirtalas jandanǵanyn aıtty.

— Konstıtýtsııa jobasy jarııalanǵan sátten bastap qoǵamdyq talqylaý aıtarlyqtaı jandana tústi. Azamattardyń usynystary men ótinishteri «e-Ótinish» platformasyna áli de túsip jatyr. Qazir olardyń jalpy sany 4 myńnan asty. Usynystar tek azamattardan ǵana emes, sarapshylardan da kelip jatyr. Advokattar qaýymdastyǵynan kelip jatqan usynystar da az emes, — dedi Jandos Shaımardanov.

Ol azamattardan kelip túsken usynystardy úsh topqa bólip sıpattady.

— Birinshisi — Konstıtýtsııanyń qoǵamdyq sanadaǵy rólin qaıta paıymdaý. Jańa Konstıtýtsııanyń jobasyn talqylaý barysynda Ata zańǵa degen qoǵamnyń kózqarasy ózgerip kele jatqany baıqalady. Azamattardyń edáýir bóligi Konstıtýtsııany tek memlekettik bılik organdarynyń ókilettikterin aıqyndaıtyn quqyqtyq qujat retinde ǵana emes, memlekettiń damýyna baǵyt-baǵdar beretin, qundylyqtar men qaǵıdattardy bekitetin tuǵyrly mátin retinde qabyldaı bastady. Azamattardyń usynystarynda Konstıtýtsııalyq normalar naqty qoldanbaly sıpatqa ıe bolyp, kúndelikti ómirge, áleýmettik ádiletke jáne memlekettik sheshimderdiń sapasyna tikeleı áser etýge tıis degen úmit aıqyn kórinis tapqan, — dedi ınstıtýt dırektory. 

Aıta ketý kerek, ótken apta aıaǵynda jarııalanǵan jańa Konstıtýtsııanyń jobasynda memlekettik tildiń mártebesi týraly norma 9-bapta ornalasqan. Ol jerde memlekettik til — qazaq tili ekeni, al memlekettik mekemeler men ózin-ózi basqarý uıymdarynda orys tili memlekettik tilmen qatar qoldanylatyny aıtylǵan.