e-Ótinish qoǵam men bılik ınstıtýttary arasyndaǵy senim kópiri — Balaeva
ASTANA. KAZINFORM — Astanada «e-Otinish» aqparattyq júıesiniń 5 jyldyǵyna oraı «e-Otinish» — «Halyq únine qulaq asatyn memleket» tujyrymdamasyn iske asyrýdyń negizgi quraly» taqyrybynda konferentsııa ótti.
Mereıtoılyq is-sharaǵa QR Prezıdentiniń quqyq máseleleri jónindegi kómekshisi Erjan Jıenbaev, Premer-mınıstrdiń orynbasary — Mádenıet jáne aqparat mınıstri Aıda Balaeva, sondaı-aq ortalyq memlekettik jáne jergilikti atqarýshy organdardyń ókilderi qatysty.
Jıynda Prezıdent kómekshisi Erjan Jıenbaev júıeniń memlekettik basqarý mádenıetin jetildirýdegi mańyzyna toqtaldy.
— Bes jyl ishinde «e-Otinish» júıesi halyqtyń memlekettik ınstıtýttarǵa degen kózqarasyn aıqyndaıtyn obektıvti ındıkatorǵa aınalyp, ashyqtyq pen eseptilikke negizdelgen memlekettik qyzmettiń jańa ádebin qalyptastyrýǵa yqpal etti. Azamattardyń ótinishterimen jumys biryńǵaı ári tutas tetik retinde jolǵa qoıyldy. Bul mehanızm ótinishterdi jedel qaraýdy ǵana emes, memlekettik organdar qyzmetine obektıvti baǵa berýdi de qamtamasyz etedi, — dedi Erjan Jıenbaev.
Qatysýshylardy quttyqtaǵan Premer-mınıstrdiń orynbasary «e-Otinish» Memleket basshysynyń «Halyq únine qulaq asatyn memleket» qurý jónindegi strategııalyq baǵytynyń is júzinde júzege asqan kórinisi ekenin atap ótti.
— Qasym-Jomart Kemeluly Toqaevtyń bastamasymen júzege asqan konstıtýtsııalyq reformalar Ádiletti Qazaqstandy qalyptastyrýdyń jańa standarttaryn bekitti. Onyń ózeginde adam quqyǵy, bıliktiń qoǵam aldyndaǵy jaýapkershiligi jáne azamattarmen ashyq dıalog qaǵıdattary tur. «e-Ótinish» júıesiniń qyzmeti dál osy qaǵıdattarmen tolyq úndesedi. Osy ýaqyt ishinde júıe azamattardyń ótinish berý jáne memlekettik máselelerdi sheshýge qatysý jónindegi konstıtýtsııalyq quqyǵyn iske asyratyn pármendi tetikke aınaldy. Jyl saıyn osy júıe arqyly azamattardyń mıllıondaǵan ótinishi qaralady. Árbir kórsetkishtiń artynda naqty adam, onyń máselesi, ádildikke degen úmiti jáne memleketke artqan senimi tur. Shyn máninde, «e-Ótinish» qoǵam men bılik ınstıtýttary arasyndaǵy senim kópiri bolyp otyr, — dedi Aıda Balaeva.
Búginde «e-Otinish» shamamen 50 myńdaı memlekettik organ men uıymdy biriktirgen tolyqqandy memlekettik ekojúıege aınaldy. Platformany 3 mıllıonnan astam azamat paıdalanady. Júıe arqyly 5 jyl ishinde 16 mıllıonnan astam ótinish qaraldy.
Aıta ketelik «E-Ótinishke» túsken usynystar sany 4 myńnan asqany týraly jazǵan edik.
