E.Orynbaev «e-learning» boıynsha qoǵamdyq tyńdaýlardy ótkizýdi usynyp otyr
ASTANA. 27 qarasha. QazAqparat - Aldaǵy ýaqytta «e-learning» (elektrondy oqytý avt.) jobasy boıynsha qoǵamdyq tyńdaýlardy uıymdastyrýǵa bolady. Búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda QR Premer-mınıstriniń orynbasary Erbol Orynbaev osyndaı usynys jasady.
«Búginde «e-learning» álem boıynsha bilim berýdiń ajyramas bóligine aınaldy. Sondyqtan biz osy baǵytty ary qaraı damytatyn bolamyz. Iá, qazir ony bireý maqtap jatsa, ekinshisi jamandap jatyr. Biraq onyń úlken bıznes ekenin umytpaý qajet. Sebebi bul jumysqa kóptegen kompanııalar tartyldy. Olar óz múddesin kózdeıdi. Máselen, keritartpa pikirdi qalyptastyryp otyrǵan sol kompanııalardyń ózderi bolýy ábden múmkin. Óıtkeni olar tıisti jumysty bastady. Endi, óz kemshilikterin joıǵysy kelmeı otyr. Sondyqtan osy másele boıynsha Bilim jáne ǵylym mınıstrligi Parlamentte, sondaı-aq halyq ishinde qoǵamdyq tyńdaýlardy ótkizip, «e-learning»-ti damytýdyń basty baǵyttaryn jan-jaqty túsindirip berýi tıis», - dep atap kórsetti E.Orynbaev.
Aıta keteıik, Qazaqstanda «e-learning» júıesin ornatyp jatqan kompanııalar kóptegen kemshilikterge jol bergen. Atap aıtqanda, kóptegen eldi mekenderde tıisti qural-jabdyqtar ornatylmady. Al ondaı tehnıka bar mektepterde elektrondy oqytý júıesi durys istemeıdi. Osyǵan baılanysty, QR Bilim jáne ǵylym mınıstrligi 15 mlrd. teńgeniń 5 mlrd.-yn aldyn ala tólem retinde bergen bolatyn. Búginde mınıstr A.Sárinjipov tıisti kemshilikter joıylmaıynsha, qalǵan 10 mlrd. teńge berilmeıdi dep otyr.
