E.Nurǵalıeva: Memlekettik qyzmettegi reformalar, eń aldymen, jastarǵa kerek

ASTANA. QazAqparat - Memlekettik qyzmettegi reformalar, eń aldymen, jastarǵa kerek. «QazAqparat» tilshilerine bergen suxbatynda «Eýrazııalyq quqyq qorǵaý ortalyǵy» qoǵamdyq qorynyń prezıdenti Eńlik Nurǵalıeva osyndaı pikir bildirdi.

«Prezıdent maqalasynda aıtylǵan mindetter jalpy memleketke ǵana emes, bizdiń qoǵamymyzdyń damýy úshin de qajetti. Sebebi, ol bizdiń ómirimizge tikeleı áser etedi, onda ekonomıkalyq daǵdarys pen geosaıası máselelerden shyǵýdyń naqty joldary kórsetilgen.

Maqalada memleketimizdiń ekonomıkalyq daǵdarysqa tótep berýi úshin ne isteý kerek, ınvestıtsııalardy tartý baǵytynda qandaı qadamdardy júzege asyrý qajettigi egjeı-tegjeıli jazylǵan», - dedi E.Nurǵalıeva QR Prezıdenti N.Nazarbaevtyń «Ult jospary - qazaqstandyq armanǵa bastaıtyn jol» maqalasyna qatysty bergen pikirinde.

Sarapshynyń sózi boıynsha, maqalada atap kórsetilgen kelesi mańyzdy taqyryp - memlekettik apparatty jetildirý reformasy.

«Memlekettik qyzmetke irikteý júrgizý kezinde merıtokratııa prıntsıpin ustaný - meniń oıymsha, bizge kerek eń mańyzdy nárselerdiń biri. Elbasy atap ótken memlekettik qyzmet reformalarynda ol naqty aıtylǵan. Syrttan eshkimniń kómeginsiz, jemqorlyqsyz mansappen kóterilý - osynyń barlyǵy túptep kelgende oń nátıjeler beredi.

Bul, ásirese, jas memlekettik qyzmetkerlerge kerek. Sebebi, olar jaqsy jumys jasaıtyn bolsa, mansappen kóteriletinin, tıisinshe táýir jalaqy alatynyn biletin bolady», - deıdi E.Nurǵalıeva.