«E-learning júıesin Qazaqstannyń barlyq mektepterinde paıdalanýdy usynamyz - Shved kompanııasynyń sarapshysy
ASTANA. QazAqparat - Shved sarapshylary qazaqtandyq E-learning júıesine qyzyǵýshylyq tanytyp otyr.
Bul týraly bilim berý júıesimen aınalysatyn shvedtik International Software Technologies (IST) kompanııasynyń keńesshisi Fýad Djazzar málim etti.
Sarapshynyń aıtýynsha, «bul mekteptegi bilim berý júıesine óte ońtaıly joba. Ol eldegi bilim berý júıesin jańa deńgeıge kóteredi.
Qazaqstanda ázirlengen júıe durys qurylǵanyn IST onyń úlgileriniń birin shvedtik elektrondyq oqytý júıesine mysal retinde qarastyrǵanynan da kórýge bolady», - deıdi Djazzar. Bul rette ol «dástúrli oqytý tásilin ózgertip, elektrondyq bilim berý júıesin engizý - bul kúrdeli, qymbat ári uzaq úderis» ekenine toqtaldy.
«Muny iske asyrý - ınfraqurylymdy, mektepterdi, ustazdardy, ákimshilerdi tolyqqandy daıarlaýdy jáne mektepten mınıstrlikke deıin bilim júıesine tartylǵan mamandardy oqytýdy talap etedi».
Djazzar sondaı-aq, Skandınavııa tájirıbesin mysalǵa keltirdi. Norvegııada bilim berýdiń 95 paıyzy aqparattyq tehnologııaǵa táýeldi, mundaı nátıjege qol jetkizý úshin 10 jyldan astam ýaqyt ketti. Bul jetistiktiń negizi - el mektepterinde sapaly bilim berý, sandyq resýrstardy paıdalana otyryp, oqytý.
«E-learning júıesin basqa júıelermen aralastyrmaı, Qazaqstannyń barlyq mektepterinde paıdalanýdy usynamyz. Ol úshin óńirler QR Bilim jáne ǵylym mınıstrliginiń baǵytyna súıenýi tıis»,- deıdi Fýad Djazzar.
