E.Qarın: Prezıdenttik saılaý - taktıkalyq qadam emes, tereń maǵynaly strategııalyq sheshim

Bul týraly búgin «Qazaqstandaǵy prezıdenttik saılaý - 2015: Ǵalamdyq synaqtardyń aldyn alý» atty dóńgelek ústel barysynda QR Prezıdenti janyndaǵy Strategııalyq zertteýler ınstıtýtynyń dırektory Erlan Qarın málim etti.

«Prezıdenttik saılaýdyń árqaısysy el táýelsizdigi damýynyń jańa kezeńine serpin berip otyrdy. 2015 jylǵy saılaý naýqany da sol maqsatta ótkizilgeli otyr. Birinshiden, negizgi ortalyq kúshterdiń geosaıası teketirestiń kesirinen álemdik saıasat týrbýlenttik aýmaqqa endi. Ýkraınadaǵy, Aýǵanstandaǵy, Sırııadaǵy qaqtyǵystar men álemdik saýda-ekonomıkalyq soǵys, ózara sanktsııalar, sondaı-aq kún ótken saıyn bul geosaıası ahýal odan ári ýshyǵyp barady. Ekinshiden, postkeńestik aımaq jańa elektoraldy tsıklge betburyp keledi. Ásirese, ortalyqazııalyq aýmaqta. Jaqynda Tájikstanda parlamenttik saılaý ótti. Qyrǵyz partııalary da saılaý naýqanyna belsendi daıyndalyp jatyr. Bizdiń strategııalyq seriktesterimiz - Ózbestanda, Belarýsta, Ázirbaıjanda prezıdenttik saılaý ótedi dep josparlanýda», - dep atap ótti ol.

Onyń aıtýynsha, ekonomıkalyq, geosaıası oqıǵalardy boljaý qıyn bolyp barady, sol protsestermen birge barsha álem, memleketter ózgerýde.

«Bizge qazir ońǵa, solǵa teńselmeı, osy týrbýlenttik kezeńnen aman-esen ótip ketýimiz óte mańyzdy bolmaq. Aldymyzdaǵy jyl qandaı bolaryn eshkim bilmeıdi, álemdik qaýymdastyq ahýaldyń kelesi kezeńi qandaı bolaryn da boljap-bile almaı otyr. Sondyqtan saılaý ótkizý jónindegi bastama - jaı ǵana taktıkalyq qadam emes, bul belgili bir jaǵymsyz stsenarıılerge tótep berýge múmkindik beretin tereń strategııalyq sheshim. Qazaqstan óziniń damý jolynyń jańa kezeńine aıaq basýda. Osy turǵyda, saılaý - álemdegi aýmaly-tókpeli kezeńnen sátti ótýge baǵyttalǵan qadam. Saılaý Prezıdent bastaǵan memleket damýynyń jańa strategııalary aınalasynda halyqty toptastyrýǵa, ortaq múddege jumyldyrýǵa qajet», - deıdi E.Qarın.

Sonymen birge, ınstıtýt dırektory, saıasattanýshy E.Qarınniń baıandaýynsha, saılaý eldegi saıası protsesterdiń jedel damýyna, partııalyq uıymdardyń belsene túsýine de yqpal etedi.