E.Qarın: Álemdik saıasattaǵy jaǵymsyz tendentsııanyń biri - elder arasyndaǵy ashyq teke-tires

ASTANA. QazAqparat - Astanada ótip jatqan HІІІ Eýrazııa medıa forýmy barasynda Aýǵanstannyń eks-prezıdenti Hamıd Karzaı «álemdegi iri derjavalar arasynda senimniń joqtyǵynan dúnıejúzi zardap shegip otyr», - degen oıyn aıtqan edi. Forým arasyndaǵy úzilis kezinde QR Prezıdenti janyndaǵy Qazaqstan strategııalyq zertteýler ınstıtýtynyń dırektory, belgili saıasattanýshy Erlan Qarınniń osy málimdemege qatysty oıyn bildik.

Erlan Qarınniń pikirinshe, bul qubylys qazir «senimsizdik» degen sózdiń aıasyna syımaıdy, bul qubylys qazir naǵyz ashyq teke-tireske aınalǵan.

«Senimsizdik bar. Ony joqqa shyǵara almaımyz. Ony biz anyq kórip otyrmyz. Tipti, bul qubylysty 10-15 jyl buryn «senimsizdik» dep aıta alar edik, qazir bul senimsizdik emes, alyp memleketter arasyndaǵy ashyq teke-tireske, qaqtyǵysqa aınalyp otyr. 10-15 jyl buryn álemdik sarapshylar «bolashaqta alyp memleketter arasynda tikeleı áskerı qaqtyǵystar bolmaıdy, memleketter janama túrde shıeleniske barýy múmkin» dep aıtar edi. Biraq, sońǵy ýaqyttaǵy álemdik saıasattaǵy jaǵymsyz tendentsııanyń biri - memleketter arasyndaǵy tikeleı saıası-ekonomıkalyq jáne áskerı qaqtyǵystardyń oryn alýy kúsheıip bara jatyr. Sondyqtan, qazir ókinishtisi, senimsizdiktiń emes, kádimgi ashyq túrdegi qaqtyǵystyń paıda bolǵanyn, onyń órship bara jatqanyn kórip otyrmyz», - dedi E.Qarın.

Bul rette, E.Qarın úsh kúnge sozylatyn HІІІ Eýrazııa medıa forýmy - tek talqylaý alańdarynyń biri ekenin jáne qandaı da bir sheshim qabyldaıtyndaı Birikken Ulttar Uıymynyń sessııasy emes ekenin atap ótti.