E-Joldar: Qazaqstan joldary tsıfrlyq baqylaýǵa kóshti
ASTANA. KAZINFORM — Qazaqstanda jol salasynyń negizgi derekterin bir tsıfrlyq ekojúıege biriktiretin E-Joldar platformasy iske qosylady. Bul júıe avtojoldar, qurylys jáne jóndeý jumystary, paıdalanǵan materıaldar, zerthanalyq synaqtar, jol boıyndaǵy ınfraqurylym men azamattardyń ótinishterin bir ortaǵa jınaqtaıdy.
Biryńǵaı tsıfrlyq platforma qurý qajettigin Memleket basshysy Qasym-Jomart Toqaev 2024 jylǵy 2 qyrkúıektegi Qazaqstan halqyna Joldaýynda atap ótken bolatyn. Prezıdent bul tetikti jol qurylysy men jóndeý jumystaryna qoǵamdyq baqylaýdy kúsheıtý quraldarynyń biri retinde aıqyndady.
— E-Joldar-dyń basty ereksheligi — jol týraly aqparatty ártúrli júıelerden jınap qana qoımaı, ony naqty nysannyń aınalasynda biriktirý. Joldyń qurylysy, paıdalanylǵan materıaly, zerthanalyq synaqtary, jóndeý jumystary men paıdalaný kezeńi týraly málimetter bir tsıfrlyq tarıhqa jınaqtalady. Bul jol salasynyń barlyq kezeńin derekter negizinde baqylaýǵa jáne basqarýǵa múmkindik beredi, — dedi «Jol aktıvteri sapasynyń ulttyq ortalyǵy» RMK dırektory Serik Imashev.
Bul rette E-Joldar qoldanystaǵy salalyq aqparattyq júıelerdiń ornyn baspaıdy. Platforma jol salasyna qatysty túrli tsıfrlyq resýrstardaǵy derekterdi bir jerge jınap, olardy ózara salystyrýǵa múmkindik beredi.
Máselen, KazToll aqyly jol ýchaskeleri týraly aqparatty, JolBitum men RCMBase — jol qurylysyna paıdalanylǵan materıaldar jáne olardyń óndirilgen jeri týraly málimetterdi naqty nysandarmen baılanystyrady. Al KazRoadLab — zerthanalyq synaqtardyń nátıjelerin jol týraly biryńǵaı tsıfrlyq derekterge engizýge jaǵdaı jasaıdy.
Jobany e-Otinish júıesimen biriktirý azamattardyń jolǵa qatysty ótinishterin naqty jol ýchaskelerimen baılanystyryp, sol nysanda júrgizilgen jóndeý jumystary men joldyń tehnıkalyq jaǵdaıy týraly aqparatpen salystyrýǵa múmkindik beredi. Sapar platformasyndaǵy málimetter E-Joldar júıesin janarmaı quıý stantsııalary, demalys oryndary, tamaqtaný oryndary, avtoturaqtar jáne jol boıyndaǵy basqa da nysandar týraly aqparatpen tolyqtyrady.
Júıeniń taǵy bir mańyzdy baǵyty — jol jaǵdaıyn taldaý. RoadIQ joldyń qazirgi jaǵdaıy, buryn júrgizilgen jóndeý jumystary jáne kólik qozǵalysynyń qarqyny týraly málimetterdi taldap, qaı ýchaskege jóndeý qajet ekenin aldyn ala anyqtaıdy jáne birinshi kezekte nazar aýdarylýy qajet joldardy kórsetedi.
— Búginde jol salasyna qatysty málimetter ártúrli aqparattyq júıelerde saqtalady. E-Joldar osy derekterdi ózara baılanystyryp, sheshim qabyldaý sapasyn arttyrýǵa baǵyttalǵan. Bul — tek tsıfrlandyrý emes, jol ınfraqurylymyn basqarýdyń jańa tásili deýge bolady. Bolashaqta naqty derekterge súıenip, qaı ýchaskege qashan jáne qandaı jóndeý qajet ekenin tıimdirek anyqtaýǵa bolady, — dedi Serik Imashev.
Aıta keteıik, 2024 jyldan bastap elimizde respýblıkalyq joldardyń 8,5 myń shaqyrymy jóndeýden ótken.
Avtojol jobalarynyń merzimi men sapasyna baqylaý kúsheıtiledi.
