«E-Islam» aqparattyq ǵalamtor saıtyn jasaý boıynsha jumys júrgizilýde - Din isteri agenttiginiń tóraǵasy
ASTANA. 15 mamyr. QazAqparat - Bıylǵy birinshi toqsanda 500 saıttyń mazmunyna taldaý júrgizilip, onyń ishinde quqyqqa qaıshy sıpattaǵy materıaldary bar 20 sheteldik ǵalamtor resýrsy anyqtaldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Din isteri agenttiginiń tóraǵasy Qaırat Lama Sharıf málim etti.
«E-Islam» aqparattyq ǵalamtor saıtyn jasaý boıynsha jumys júrgizilýde. Bul saıt halyqtyń dinge senýshi nemese dinge qyzyǵýshylyq tanytýshy bóliginiń dástúrli ıslamnyń rýhanı-mádenı qundylyqtaryna qyzyǵýshylyǵyn arttyrýǵa, rýhanııat pen mádenıettiń qazaqy dástúrlerin nasıhattaýǵa, sondaı-aq, destrýktıvti sıpattaǵy dástúrli emes ıslamdyq aǵymdardyń ıdeıalary men qyzmetiniń taralýyna jol bermeýge baǵyttalady»,-dedi vedomstvo basshysy.
Ol turaqty negizde dinı-ekstremıstik jáne lańkestik toptardyń aqparattyq órisine shekteý qoıý maqsatynda ǵalamtor saıttaryna monıtorıng júrgizý boıynsha jumystar atqarylyp jatqandyǵyn sóz etti. «Saıttarǵa Qazaqstannyń zańnamasyna qaıshy keletin materıaldardy anyqtaý maqsatynda dintaný saraptamasy júrgizilip, eger atalǵan belgiler anyqtalǵan jaǵdaıda olardy jabý boıynsha ári qaraı sharalar qabyldaý úshin Bas prokýratýraǵa jiberiledi»,-deıdi agenttik basshysy.
Onyń sózine qaraǵanda, 2013 jyldyń birinshi toqsanynda Agenttik 500 saıttyń mazmunyna taldaý júrgizdi, onyń ishinde quqyqqa qaıshy sıpattaǵy materıaldary bar 20 sheteldik ǵalamtor resýrsy anyqtaldy.
«Budan basqa, bıylǵy birinshi toqsanda memlekettik organdardyń suratýy boıynsha 30 ǵalamtor resýrsynyń mazmunyna dintaný saraptamasy júrgizildi, onyń ishinde quqyqqa qaıshy sıpatqa ıe materıaldary bar 17 saıtqa júrgizilgen dintaný saraptamasynyń qorytyndylary sheshim qabyldaý úshin prokýratýra organdaryna joldandy. Sondaı-aq, saıttarǵa ornalastyrylǵan 34 materıaldyń mazmunyna dintaný saraptamasy júrgizildi»,-dep toqtaldy Qaırat Lama Sharıf.
