E. Hasanǵalıevtiń «Azıada Alaýy» áni VII qysqy Azııa oıyndarynyń ánurany bolyp tańdaldy
ALMATY. 7 jeltoqsan. QazAqparat /Erbol Turymbetov/ - QR-nyń Halyq ártisi, belgili kompozıtor Eskendir Hasanǵalıevtiń «Azıada Alaýy» áni VII qysqy Azııa oıyndarynyń ánurany bolyp tańdaldy.
Bul týraly búgin Almatyda ótken baspasóz máslıhatynda belgili boldy.
«Azıada Alaýy» ánin barlyq 4 myńǵa jýyq daýys berýshilerdiń 49 paıyzy qoldaǵan. Azıada ánuranyn tańdaý osy jyldyń 1 qarashasynan 25 qarashasyna deıin sms-daýys berý arqyly ótti. Ánder «Qazaq radıosy», «NS radıosy» jáne «Sálem radıosy» tolqyndarynan taratyldy. Sonymen qatar, bul shyǵarmalardy Azııa oıyndary resmı saıtynan jáne Azıada-2011 resmı uıaly operatory - GSM Kazahstan/Kcell kompanııasynyń saıtynan tyńdaýǵa usynyldy.
Aıta keteıik, tamyzdyń 24 kúni VII qysqy Azııa oıyndaryn uıymdastyrý komıteti Aq Azıada ánuranyna baıqaý jarııalaǵan bolatyn.
Jeńimpazǵa «2011 jylǵy VII qysqy Azııa oıyndaryn uıymdastyrý komıteti atqarýshy dırektsııasy» AQ vıtse-prezıdenti Maǵjan Qanqojın 1 mıllıon teńgeniń sertıfıkatyn tabys etti.
«2011 jylǵy VII qysqy Azııa oıyndaryn uıymdastyrý komıteti atqarýshy dırektsııasy» AQ Oıyndardyń metodologııa departamentiniń dırektory Nurlan Nurǵazın atalmash konkýrsqa qatysqandarǵa, sonyń ishinde uıymdastyrý seriktesteri: Astana jáne Almaty ákimshilikteri men GSM Qazaqstan/Kcell uıaly operatoryna, «Qazaqstan RTRK» jáne «Mıras sport» QQ-ǵa alǵysyn bildirdi. «Qorytyndyny 1 jeltoqsanda jarııalaıtyn bolǵanbyz. Alaıda, EQYU Sammıti kóleńkesinde qalmas úshin keıinge shegerýge týra keldi», dedi ol.
24 tamyz ben 10 qazan aralyǵynda uıymdastyrý komıtetine 105 baıqaý jumysy kelip tústi. Olardyń ishinde 49 án - qazaq, 45-i orys jáne basqa tilderdi qamtyǵan 11 mýzykalyq kompozıtsııa boldy. Baıqaýǵa qatysqandardyń ishindegi jas mólsheri úlkeni Almaty qalasynyń 72 jastaǵy zeınetkeri, eń jasy Shymkent qalasynyń 17 jasar oqýshysy boldy.
Al 27 qazanda ótken baspasóz máslıhatynda qazylar alqasy qorytyndy jarııalap, aqtyq synǵa 10 ánniń tizimin shyǵarǵan edi.
