E-gov portalynda deklaratsııany tapsyrýdyń jańa servısi iske qosyldy

ASTANA. QazAqparat - Jalpyǵa birdeı deklaratsııalaý aıasynda salyq deklaratsııasyn tapsyrý úshin jańa fýnktsıonal iske qosyldy. Bul týraly QazAqparat Memlekttik kirister komıtetine silteme jasap habarlaıdy.

«Elektrondyq úkimet» portalynda (E-gov.kz) «Keden jáne salyqtar», «Salyq salý» bóliminde kirister men múlik týraly deklaratsııany (270.00-nysan) elektrondy túrde usyný boıynsha fýnktsıonal iske qosyldy.

Salyq kodeksiniń 633-babyna sáıkes kirister men múlik týraly deklaratsııany (270.00-nysan) kodekstiń 630-babynyń 1-tarmaǵynda atalǵan jeke tulǵalar jyl saıyn, aktıvter men mindettemeler týraly deklaratsııa (250.00-nysan) usynylatyn jyldan keıingi jyldan bastap esepti salyqtyq kezeńniń 31 jeltoqsanyndaǵy jaǵdaı boıynsha usynady.

Aǵymdaǵy jyly atalǵan deklaratsııany 2021 jyly, ıaǵnı birinshi kezeńde, deklaratsııalaý júıesine kirgen tulǵalar tapsyrady.

Eske sala keteıik, deklaratsııany tapsyrý merzimi:

15 shildege deıin – qaǵaz túrinde

15 qyrkúıekke deıin – elektrondy túrde

Deklaratsııany elektrondy túrde «Salyq tóleýshiniń kabıneti» (kgd.gov.kz) jáne «e-Salyq Azamat» mobıldi qosymshasy arqyly da tapsyrýǵa bolady.

Aktıvter men mindettemeler týraly deklaratsııany (250.00-nysan) da E-gov.kz portaly arqyly tapsyrýǵa bolady. Ony aǵymdaǵy jyly memlekettik mekemeler men kvazımemlekettik sektor uıymdarynyń qyzmetkerleri men olardyń jubaılary usynýy qajet.