E-gov qosymshasy Búkilálemdik úkimettik forým nusqasy boıynsha úzdik tanyldy
Bul jaıynda búgin Astana ekonomıkalyq forýmy aıasynda ótken álemdik ekonomıkanyń tsıfrlyq transformatsııasyna arnalǵan sessııada QR Aqparat jáne kommýnıkatsııalar vıtse-mınıstri Qaırat Balyqbaev málim etti, dep habarlaıdy QazAqparat.
Qaırat Balyqbaevtyń atap ótýinshe, Qazaqstanda elektrondy úkimettiń ınfraqurylymy qalyptastyrylyp, onyń bazalyq komponentteri qurylǵan. Sonyń arqasynda 700-den astam qyzmet pen servıs elektrondy nusqada beriledi.
«2012 jyldan bastap barlyq lıtsenzııalar elektrondy túrde beriledi. Utqyr úkimet arqyly 83 qyzmet pen servıs azamattar úshin qoljetimdi. Aıta keterligi, qazaqstandyq E-gov qosymshasy Búkilálemdik úkimettik forým nusqasy boıynsha «one stop shop» atalymynda memlekettik qyzmetterdi usynýdaǵy úzdik qosymsha atandy», - dedi Qaırat Balyqbaev.
Sonymen qatar vıtse-mınıstr elimizde jyl saıyn Halyqqa qyzmet kórsetý ortalyqtary arqyly kórsetiletin memlekettik qyzmetter sanynyń ósip kele jatqanyn basa aıtty.
«Máselen, ótken jyly biz 26 mıllıonnan astam qyzmet kórsettik. Júıeli júrgizilgen birqatar jumystyń nátıjesinde Qazaqstan halyqaralyq reıtıngterdegi kórsetkishin jaqsarta tústi. Máselen, ótken jyly Qazaqstan BUU-nyń elektrondy úkimet reıtınginde álemniń 193 eliniń ishinde 33-oryn aldy. Al 2016 jyldyń qorytyndysynda Búkilálemdik ekonomıkalyq forýmnyń jelilik daıyndyq esebiniń ındeksinde 139 memlekettiń ishinde 39-orynǵa turaqtady», - dedi ol.
