E. Dosaevtyń densaýlyq saqtaý salasyna kóńili tolmaıdy
ASTANA. 23 qazan. QazAqparat - Medıtsınalyq qyzmettiń sapasyn tómengi satydan bastap kóterý asa mańyzdy.
Búgin Úkimet otyrysynan keıin jýrnalısterge suhbat bergen QR Ekonomıkalyq damý jáne saýda mınıstri Erbolat Dosaev osylaı aıtty.
Kezinde Densaýlyq saqtaý mınıstri qyzmetin atqarǵan E.Dosaev (2004-2006) búginde atalǵan saladaǵy qyzmet kórsetý sapasyn barynsha kóterý qajet dep sanaıdy. «Qazirgi kezde alǵashqy medıtsınalyq kómek berý kezinde azamattar san alýan qıyndyqtarǵa tap bolyp jatady. Sondyqtan medıtsınalyq qyzmettiń sapasyn tómengi satydan bastap kóterý asa mańyzdy. Árıne, emhanalardy kóptep salǵan jaqsy. Biraq ony sapaly medıtsınalyq kómekpen toltyrý ol - bir bólek másele», - deıdi E.Dosaev. Mınıstr atap kórsetkendeı, búginde «Salamatty Qazaqstan» baǵdarlamasynyń birinshi kezeńi aıaqtaldy. Endi, ekinshi kezeńin oryndaý barysynda medıtsınalyq kómektiń sapasyn arttyrý jumysyna erekshe kóńil bólinetin bolady.
