E.Birtanov «Densaýlyq» memlekettik baǵdarlamasynyń basty baǵyttaryn túsindirdi
2016 jylǵy 15 qańtarda 2016-2019 jyldarǵa arnalǵan Qazaqstan Respýblıkasynyń Densaýlyq saqtaý salasyn damytýdyń «Densaýlyq» memlekettik baǵdarlamasyna qol qoıǵanyn eske salyp ótken vıtse-mınıstr, bul turǵyda qujat aıasynda 7 baǵyt qamtylǵanyn atady.
Ol kelesi baǵyttar boıynsha júzege asyrylady: halyqtyń densaýlyǵyn qorǵaýǵa negiz bolatyn qoǵamdyq densaýlyq saqtaý júıesin damytý, alǵashqy medıtsınalyq-sanıtarııalyq kómekti (ári qaraı - MSAK) basymdyqpen damytý jáne ony jetildirý negizinde halyqtyń suranysyna qaraı barlyq densaýlyq saqtaý qyzmetterin biriktirý; medıtsınalyq qyzmettiń sapasyn qamtamasyz etý; dári-dármekpen qamtamasyz etýdiń Ulttyq saıasatyn júzege asyrý; densaýlyq saqtaý júıesiniń qarjylyq turaqtylyǵy men yntymaqtastyǵyn engizý negizinde atalǵan júıeni jetildirý; densaýlyq saqtaý salasyndaǵy adamı resýrstardy basqarýdyń tıimdiligin arttyrý; memlekettik-jekemenshik áriptestik, ınnovatsııalar men zamanaýı aqparattyq-kommýnıkatsııalyq tehnologııalar negizinde densaýlyq saqtaý salasynyń ınfraqurylymyn ári qaraı damytýdy qamtamasyz etý.
Belgili bolǵandaı, úzdik halyqaralyq tájirıbege sáıkes, densaýlyq saqtaý júıesin ári qaraı damytýǵa negiz retinde Qoǵamdyq densaýlyq saqtaý júıesi qurylatyn bolady.
Onyń negizgi atqaratyn qyzmetteri: halyq arasynda salaýatty ómir saltyn nasıhattaý men aǵartý sharalaryn júrgizý; juqpaly jáne negizgi juqpaly emes aýrýlardyń, onyń ishinde psıhıkalyq aýytqýlar men jaraqattanýshylyqty baqylaý; halyqtyń densaýlyǵyn nyǵaıtý men ony qorǵaýǵa baǵyttalǵan sektoraralyq ózara yntymaqtastyqty qamtamasyz etý; epıdemıologııalyq qaýipsizdik pen densaýlyqty qorǵaý salalaryndaǵy zańnamanyń saqtalýyn baqylaý; aımaqtyq jáne ulttyq deńgeıdegi aýrýlardyń damýyn uzaq merzimdi boljaý.