E.Bekmahanov myń ólip, myń tirilgen qazaqtyń oı-sanasyna erekshe serpin bergen uly tulǵa - Á.Kekilbaev
ASTANA. QazAqparat - Bıyl ǵasyrlyq mereıtoıy atalyp ótip jatqan uly ǵalym, qazaqtan shyqqan alǵashqy tarıh ǵylymdarynyń doktory Ermuqan Bekmahanov myń ólip-myń tirilgen qazaqtyń oı sanasyna erekshe serpin bergen uly tulǵa edi. Bul pikirdi keshe Astanadaǵy «Kerýen» oıyn-saýyq ortalyǵynyń kınoteatrynda alash arysynyń ómiri men qyzmetine arnalǵan «Qazaqfılm» AQ kınostýdııasy shyǵarǵan Satybaldy Narymbetovtiń «Amanat» kórkem fılminiń tanystyrylymynda belgili memleket qaıratkeri, jazýshy, Qazaqstannyń Eńbek Eri Ábish Kekilbaev aıtty.
«Onyń jazyqsyz qýdalanǵanyna qaramastan doktorlyq ǵylymı ataǵyn ekinshi ret qorǵap shyǵýynyń ózi - úlken erlik. Al óktemshil totalıtarlyq júıeniń seńi buzylmaı, siresip turǵan kezdiń ózinde Kenesary Qasymovtyń ult-azattyq kóterilisi týraly monografııa jazýynyń ózi - jankeshti, kózsiz erlik bolatyn. 50 jyl ǵana ómir súrgen, onyń da kóbin qýǵynmen ótkizgen ǵalymnyń qazaq tarıhynyń shynaıy júıesin jasap, keıingi urpaqqa qaldyrǵan tálimdi úlgisi eshqashan da umytylmaıdy», - dedi Á.Kekilbaev.
Tanystyrylymda sóz alǵan fılmniń keńesshileri, belgili ǵalym Maqsut Nárikbaev, «Tamasha adamdar ómiri» serııasynan Máskeýden «Ermuqan Bekmahanov» atty ǵumyrnamalyq kitap shyǵarǵan jazýshy Medeý Sárseke, tarıhshy, QR Ulttyq Ǵylym akademııasynyń akademıgi Mámbet Qoıgeldi, fılmniń stsenarııshisi ári qoıýshy-rejısseri Satybaldy Narymbetov fılmniń búgingi kórermen úshin óz tarıhyn tanýdaǵy mańyzy týraly áńgime qozǵady. Atalmysh fılm búgin elimizde keńinen atalyp ótip jatqan saıası qýǵyn-súrgin qurbandaryn eske alý kúnine oraılastyryldy.
Budan buryn, habarlaǵanymyzdaı, fılmniń jelisi birneshe ýaqyt aralyǵyn qamtıdy: HІH ǵasyrdyń orta tusy - Kenesary hannyń táýelsizdik jolyndaǵy kúresi, HH ǵasyrdyń ortasy jáne 60 jyldardyń sońy. Fılmde qazaqtyń sońǵy hany Kenesary Qasymuly bastaǵan ult-azattyq kóteriliske arnalǵan zertteýleri úshin 25 jylǵa bas bostandyǵynan aıyrylǵan totalıtarlyq júıeniń qurbany, Alash arysy Ermuhan Bekmahanovtyń taǵdyry baıandalady. Qazaq halqynyń bolashaǵyna alańdaǵan fılmdegi ár keıipkerdiń taǵdyry óz zamanynda sýrettelse, olardyń alǵa qoıǵan maqsat-múddeleri bir - ar-ojdanyna berik bolý jáne óz halqynyń bostandyǵyna qol jetkizý.
Fılmniń rejısseri jáne stsenarıı avtory - Qazaqstannyń eńbek sińirgen qaıratkeri, QR Memlekettik syılyǵynyń laýreaty Satybaldy Narymbetov. Basty rólderde Berik Aıtjanov (Ermuhan Bekmahanov), Qarlyǵash Muhamedjanova (áıeli - Halıma), Sanjar Mádıev (Kenesary han), Ázız Beıshenalıev (KGB qyzmetkeri).
Saılaý Abylaev
