E-archive platformasy iske qosylady: elimizdegi arhıv qujattardyń 25%-y elektrondyq formatqa kóshirildi
ASTANA. KAZINFORM — Qazirgi tańda elimizdiń arhıv qorlarynyń 25%-y elektrondyq nusqaǵa kóshirildi. Birer jylda kez kelgen qazaqstandyq muraǵatta saqtalǵan aqparattardy úıinde otyryp-aq kóre alady. Bul týraly Jibek Joly arnasynyń «Búgin LIVE» baǵdarlamasyna suhbat bergen Arhıvtik tehnologııalar jáne tsıfrlandyrý bóliminiń mamany málimdedi.
— Qazirgi tańda bizdegi arhıv qorlarynyń shamamen 25%-y elektrondyq formatqa kóshirildi. Tolyq kóshirý jumystary shamamen 2030–2032 jyldary aıaqtalýy múmkin. Tsıfrlandyrý jumystary tarıhı jáne azamattyq qujattar arasynda birdeı júrgizilip jatyr. Degenmen tarıhı qujattarǵa basymdyq berilip otyr. Sebebi olar ulttyq mádenıet pen tarıhty saqtaý úshin mańyzdy ról atqarady, — deıdi Jazıra Estekova.
Birer jylda qazaqstandyqtar arhıv materıaldaryna e-archive platformasy arqyly onlaın qol jetkize alady.
— Qarapaıym halyq arhıv materıaldarǵa onlaın túrde «Elektrondy arhıv» platformasy arqyly qol jetkize alady. Qazirgi tańda e-archive platformasynyń jumysy júzege asyrylyp jatyr. Sol jumys tolyq aıaqtalǵan soń barlyq aqparat halyqqa qoljetimdi bolady, — deıdi Arhıvtik tehnologııalar jáne tsıfrlandyrý bóliminiń mamany.
Arhıvıst qujattardy elektrondy nusqaǵa kóshirgende birqatar qıyndyq týyndaǵanyn aıtady. Máselen, 1991 jylǵa deıingi qujattar skanerden durys ótpeıtin kórinedi. Alaıda otandyq mamandar qujattardy tsıfrlyq nusqaǵa aýystyrý úshin ózge elderdiń tájirıbelerin de qoldanatyndaryn jetkizdi.
— Bul salada Halyqaralyq arhıvter keńesi men ıÝNESKO-men yntymaqtastyq bar. Qazaqstanda halyqaralyq standarttardy engizý jáne arhıv isiniń sapasyn arttyrý maqsatynda osy uıymdarmen birlese jumys isteımiz. Oǵan qosa aımaqtar men ortalyqtardyń tsıfrlyq damý alshaqtyǵyn teńestirý úshin arnaıy granttar bólip, tehnıkalyq qoldaý kórsetý jumystaryn josparlap otyrmyz. Jáne soǵan baılanysty arnaıy oqytý baǵdarlamalary uıymdastyrylady, — deıdi arhıvıst.
Aıta keteıik, birer kún buryn inDrive halyqaralyq servısiniń negizin qalaýshy Arsen Tomskıı Qazaqstanǵa tsıfrlyq táýelsizdik jaıyn oılanýǵa keńes bergen edi.