E. A. Bóketov atyndaǵy Qaraǵandy ýnıversıtetine ulttyq mártebe berildi

QARAǴANDY. KAZINFORM — Qazaqstan Respýblıkasy Prezıdentiniń Jarlyǵymen akademık E. A. Bóketov atyndaǵy Qaraǵandy ýnıversıtetine ulttyq joǵary oqý orny mártebesi berildi. Bul týraly Qaraǵandy oblysynyń ákimdigi málim etti.

Bul sheshim oqý ornyna akademııalyq jáne ǵylymı derbestigin keńeıtýge, úzdik ǵalymdar men qosymsha resýrstar tartýǵa, halyqaralyq bilim keńistigindegi bedelin nyǵaıtýǵa jol ashady.

— Jańa mártebe aıasynda ınnovatsııalyq bilim berý baǵdarlamalaryn iske asyrýǵa, zamanaýı ǵylymı zertteýler júrgizýge jáne básekege qabiletti mamandar daıarlaýǵa keń múmkindikter beredi, — dep jazdy ákimdikten. 

Endi oqý orny akademık E. A. Bóketov atyndaǵy Qaraǵandy ulttyq zertteý ýnıversıteti dep atalady. Bul ýnıversıtet elimizdegi 18-shi ulttyq joǵary oqý orny.

Jańa mártebeniń berilýi — oqý ornynyń otandyq ǵylym men bilim salasyn órkendetýdegi aıryqsha úlesiniń kezekti moıyndalýy.

Ýnıversıtet tarıhy 1938 jyldan bastaý alady. Sol jyly bilim ordasy pedagogıkalyq ınstıtýt retinde ashylyp, 1972 jyly ýnıversıtet mártebesin ıelendi. Ol kezeńde Qazaqstanda nebári eki ǵana ýnıversıtet — QazMÝ men QarMÝ bar edi, al ózge joǵary oqý oryndary ınstıtýttar bolatyn.

Ótken jyly bul oqý ornyna zertteý ýnıversıteti mártebesi berilgen.