Dzıýdoshylar Eldos Jumaqanov pen Galbadrah Otgontsetseg sporttaǵy mansaptaryn aıaqtady
NUR-SULTAN. QazAqparat - Dzıýdodan Qazaqstan komandasynyń múshesi Eldos Jumaqanov pen Galbadrah Otgontsetseg sporttyq mansabyn aıaqtady. Bul týraly Oralda ótip jatqan el chempıonatynda belgili boldy, dep habarlaıdy QazAqparat QR Ulttyq Olımpıada komıtetine silteme jasap.
Eldos Jumaqanov uzaq jyldar boıy Qazaqstan komandasynyń namysyn abyroımen qorǵap keldi. 66 keli salmaqta óner kórsetip kelgen ol sportqa bes jasynda qadam basqan. Osy jyldar aralyǵynda Eldos Jumaqanov áskerıler arasyndaǵy álem chempıony, Gran-prı týrnıriniń jeńimpazy (2013), atalǵan týrnırdiń kúmis jáne qola júldegeri (2016, 2019) atandy.
Masters týrnıri (2017) men Eýropa kýboginiń (2015) kúmis júldegeri. Sondaı-aq Eldostyń júlde qorjynynda Azııa birinshiliginiń tórt medali bar. Ol 2015 jyly El-Kýveıtte, 2016 jyly Tashkentte ótken qurlyq dodasynda qola júldege qol jetkizse, 2017 jyly Gonkong jáne 2019 jyly Fýdjeırada ótken Azııa chempıonatynda kúmis medal taqqan.
Sonymen qatar, Eldos Jumaqanov 2018 jyly Djakartada (Indonezııa) ótken Azııa oıyndarynyń qola júldegeri atanǵan.
«Búgin kásibı sportshy retinde sporttaǵy mansabymdy aıaqtap otyrmyn. Árıne, mundaı sheshimdi qabyldaý men úshin ońaıǵa soqqan joq. Dzıýdoshy retinde ulttyq qurama sapynda 12 jyl ter tóktim. Osy jyldar aralyǵynda jeńis pen jeńilis, qıyndyq pen qýanysh qatar júrdi…
Dzıýdo áleminen túbegeıli bas tartý múmkin emes. Búgin dzıýdoshy retinde sport mansabymdy aıaqtaǵanymmen Qazaqstan sportyna qyzmet etýimdi ári qaraı jalǵastyramyn», - dedi Eldos.
Galbadrah Otgontsetsegtiń sporttyq ǵumyryndaǵy eń iri jeńisi – 2016 jylǵy Rıo Olımpıadasynyń qola júldesi. 48 kelide el namysyn qorǵaǵan Galbadrah eki márte (2017, 2018) álem chempıonatynyń qola júldegeri atanǵan.
Sondaı-aq Azııa oıyndary (2018) men Ýnıversıadada (2017) úzdik úshtikke enip, 2018 jyly Tashkentte ótken Azııa chempıonatynda top jardy.
