Dzıýdoshy Suńǵat Jubatqan Gran-prı týrnıriniń qola júldegeri atandy
ASTANA. QazAqparat – Qazaqstandyq Suńǵat Jubatqan Dýshanbede dzıýdodan ótip jatqan Gran-prı týrnıriniń qola júldegeri atandy, dep habarlaıdy QazAqparat tilshisi.
«Sportty damytý dırektsııasy» RMQK-nyń baspasóz qyzmetinen málim etkenindeı, qazaqstandyq dzıýdoshy 66 kelige deıingi salmaqta úzdik úshtikke ilikti.
Suńǵat Jubatqan aldymen Izraıl dzıýdoshysyn, ekinshi aınalymda jarys qojaıyny Nuralı Emomalıdi joldan taıdyrdy. Degenmen shırek fınalda reseılik Mýrad Shopanovqa ese jiberdi.
Odan keıin jubanysh beldesinde ulybrıtanııalyq dzıýdoshyny jeńip, qola medal úshin kúresýge múmkindik aldy. Munda ol ıspanııalyq Adrıan Neto Chınarrodan basym tústi.
Bul – ulttyq quramanyń osy týrnırdegi alǵashqy medali.
Foto - «Sportty damytý dırektsııasy»
