Dzıýdoshylarymyzdyń júldege talasýǵa múmkindigi bar – bas bapker Nurbol Súleımenov
ASTANA. KAZINFORM – Parıjde ótetin XXXIIІ Jazǵy Olımpıada oıyndaryna dzıýdodan Qazaqstan ulttyq qurama komandasynan 8 dzıýdoshy qatysady. Onyń jeteýi – óz salmaq dárejelerinde jekeleı saıysqa qatyssa, bir sportshy aralas-komandalyq jarystyń lıtsenzııasyna ıe bolǵan.
Osy oraıda dzıýdodan Qazaqstan erler quramasynyń bas bapkeri Nurbol Súleımenov kazinform tilshisine suhbat berip, sportshylardyń Olımpıada oıyndaryna daıyndyǵy týraly aıtyp berdi.
«Qazaqstan ulttyq qurama komandasy Parıj Olımpıadasy aldyndaǵy sońǵy daıyndyqtaryn óte joǵary deńgeıde pysyqtap jatyr. Qazirgi tańda qurama Ispanııadan elge oralyp, Almaty oblysynda jańadan salynǵan olımpıadalyq keshende sońǵy oqý jattyǵý jıynyn ótkizip jatyrmyz. Jattyǵý jıyny 17 shildege deıin jalǵasady. Al 18 shilde kúni Parıjge Almatydan attanatyn bolamyz», - dep atap ótti bas bapker.
Sonymen qatar, shákirtteri Olımpıadada qaı kúni jarysqa shyǵatynyn, júldege talasýǵa barlyǵynyń múmkindikteri bar ekenin jasyrmaı atap ótti.
«Ózderińiz bilesizder, Olımpıadada erler arasynda 60 kelide Eldos Smetov, 66 kelide Ǵusman Qyrǵyzbaev, 73 kelide Danııar Shamshaev,81 kelide Abylaıhan Jubanazar jáne 100 kelige deıingi salmaqta Nurlyhan Sharhan el namysyn qorǵaıdy. Barlyǵy óz salmaqtarynyń myqtylary. Eldos eki birdeı Olımpıadada elge júlde syılady. Bıyl da aıanyp qalmaımyn dep otyr. Barlyǵynyń júldege talasýǵa múmkindikteri bar. Dzıýdoshylarymyzdan birinshi bolyp, 27 shilde kúni Eldos Smetov synǵa túsedi. Jalpy, Olımpıada oıyndarynda dzıýdo boıynsha jarystar 27 shilde men 3 tamyz aralyǵyna josparlanǵan», - dedi bas bapker.
Esterińizge sala keteıik, dzıýdodan áıelder arasynda Ábıba Abýjaqynova (48 kg), Kamıla Berliqash (+78 kg), Esmıgúl Kýıýlova (aralas-komandalyq jarys) el namysyn qorǵaıdy. Komandanyń úzdigi Abıba Ábýjaqynova da 27 shildede tatamıge shyǵady.
