Dzıýdoǵa aýysqanymdy áke-sheshem birden qoldamady - Azııa chempıonatynyń eki dúrkin kúmis júldegeri
Ábıba Ábýjaqynova 1997 jyly Ózbekstan Respýblıkasynyń Tashkent oblysyndaǵy Shyrshyq qalasynda dúnıege kelgen. Anasynyń keńesimen bala kúninde kórkem gımnastıkamen shuǵyldana bastaǵan. Alaıda, onyń qalaýy bir jyldan soń dzıýdoǵa aýǵan.
– Kórkem gımnastıkadan dzıýdoǵa aýysýyńa ne sebep boldy?
– Dzıýdoǵa qyzyǵyp, óz qalaýymmen aýystym. Buǵan meni eshkim májbúr etken joq. Tipti, maǵan dzıýdoǵa aýysý týraly eshkim keńes bermedi. Nege ekenin bilmeımin, ózim dzıýdoǵa aýysqym keldi. Biraq, meniń bul tańdaýymdy áke-sheshem bastapqyda qoldady dep aıta almaımyn. Óıtkeni, olar «Bul – qyz balaǵa tán sport emes. Uldarmen birge alysyp-julysyp júresiń be? Qol-aıaǵyńdy aýyrtyp alasyń ǵoı» dep qarsylyǵyn bildirdi. Árıne, olardyń bul qarsylyǵy maǵan janashyrlyǵynan týyndaǵanyn bilemin. Solaı bola tursa da, men óz tańdaýymnan aınymaı, dzıýdomen aınalysýdy toqtatpadym.
– Alǵashqy bapkeriń kim edi?
– Dzıýdonyń qyr-syryn úıretken alǵashqy bapkerim – Baqytjan Jumanov. Ózbekstanda turatyn qazaq bapkeri meniń osy sporttaǵy jetistigimniń bastaýyn salyp berdi. Óıtkeni, onyń keńesimen, úıretýimen jarystardan alǵash ret júldeli oryndardy ıelendim. Bul áke-sheshemniń dzıýdoǵa degen kózqarasyn túbegeıli ózgertti.
– Qazaq eline qashan kóship keldiń?
– Álemniń ár qıyrynda turyp jatqan ár qazaqtyń júreginde «Atamekenge qonys aýdarsaq» degen arman júretini jasyryn emes. Sol arman jetegimen 2014 jyly Shymkent qalasyna kóship keldik. Almatydaǵy respýblıkalyq sport kolledjine oqýǵa qabyldandym. Kezinde Azııa oıyndarynyń, qurlyq chempıonatynyń júldegeri bolǵan dzıýdoshy, qazir bilikti bapker Nurbol Súleımenovtiń qaraýynda jattyǵa bastadym. Sońǵy jyldary Atyraý qalasyna aýystym. Qazirgi bapkerim – Meıirjan Esmaǵambetov.
– Qazaqstanǵa kóship kelgennen keıin jastar arasynda álem birinshiliginiń kúmis júldegeri atandyń ǵoı. Altyn medal alýyńa ne kedergi boldy?
– Iá, bul doda 2017 jyly Horvatııanyń astanasy Zagreb qalasynda ótken edi. Bul – meniń halyqaralyq dodada qol jetkizgen alǵashqy jetistigim. Sol sebepten, ony umyta almaımyn. Zagrebtegi álem chempıonatynda Horvatııa, Reseı, Belgııa jáne Brazılııanyń balýandarynan basym tústim. Alaıda, aqtyq synda japon boıjetkeninen utylyp qaldym. Buǵan ózimniń qateligim sebep boldy. Biraq, sol kezde tik turyp kúresý kezinde qarsylastaryma «aýyrtý» ádisin qoldanǵan edim. Keıinnen bul ádisti dzıýdo kúresinen alyp tastady.
– Ótken jyly Bishkekte ótken Azııa chempıonatynyń kúmis júldesin ıelendiń. Jeńiske bir taban jaqyn tur ediń...
– Barlyq sportshy mundaı chempıonatqa chempıon atanýdy maqsat etip barady ǵoı. Mende de sondaı maqsat bolǵanyn jasyrmaımyn. Tipti, úmitim zor edi. Aqtyq synǵa deıin qarsylastarymnyń bárin uttym. Biraq, aqtyq synda Lı ıAnannan jeńildim. Ol – myqty balýan. Bastapqyda upaı sany meniń enshimde bolatyn. Ózim bolmashy qatelik jiberip aldym. Qytaı balýany bul sátti ońtaıly paıdalanyp ketti.
– Al, jaqynda Nur-Sultan qalasynda ótken Azııa chempıonatynda chempıon atanatyn múmkindigiń boldy ǵoı. Biraq...
– Qaı jarysqa barsam da, aldymen eldiń abyroıyn, qazaqtyń namysyn qorǵaımyn dep attanamyn. Alda da qazaq eliniń, qazaqtyń abyroıyn asqaqtata beremin.
Al, bıylǵy Azııa chempıonatynyń jóni bólek. Aldymen, bul doda elordamyzda ótti. Ekinshiden, maǵan Azııa chempıony atanatyn sát týǵan edi. Taıpeılik Lın Chen-Hao men Mońǵolııa balýany Narantsetseg Ganbaatardy utyp, aqtyq synǵa jaqsy daıynyqpen keldim. Alaıda, japon balýany Vakana Koga basymdyǵyn tanytty. Japon sportshysyn jeńýim múmkin edi. Óıtkeni, onyń solaqaı balýanmen kezdesse, abdyrap qalatynyn baıqap júrmin. Men de solaqaımyn. Soǵan qaramastan, ol meniń josparymdy iske asyrýǵa múmkindik bermedi. Qol sozym jerde turǵan altyn medalǵa ıe bola almadym. Sóıtip, ekinshi ret Azııa chempıonatynyń kúmis júldegeri atandym.
– Áńgimeńe rahmet!
