Dzıýdodan jastar arasyndaǵy álem chempıonatyna baratyn qazaqstandyq balýandar anyqtaldy

ASTANA. KAZINFORM - Perýdiń Lıma qalasynda 5-7 qazan aralyǵynda ótetin dzıýdodan jastar arasynda álem chempıonatyna qatysatyn qazaqstandyq balýandar belgili boldy.

Álemdik dodada 18 balýan el namysyn qorǵaıdy.

Halyqaralyq dzıýdo federatsııasynyń málimetinshe, ulttyq qurama sapyna tómendegideı dzıýdoshylar engen. Bedeldi básekede elimizdiń atynan uldarda Talǵat Orynbasar men Teljan Sultanbaı (60 keli), Aqyljan Jubatqanov pen Qaıyrhan Abdrahman (66 keli), Omar Nurbergenov (73 keli), Danııl Krylov pen Arman Bılalhanov (90 keli),Asqar Berjanov (100 keli), Jantilek Nurtilepuly (100 keliden joǵary) tatamıge shyǵady. 

Al qyzdarda Tasnım Ábdýáli men Sabına ıÝldashbekova (48 keli), Nuraılym Sársenbek pen Aıaýlym Qaırat, Dana Ábdirova (57 keli), Dılnaz Dosbergen (63 keli), Kórkem Orymbek (70 keli), Anastasııa Nagachevskaıa men Saltanat Ahmetova (78 keli) sekildi balýandarǵa senim artamyz.

Eske salsaq, budan buryn dzıýdodan Qazaqstan jastar quramasy Azııa chempıonatyn 12 medalmen aıaqtady.