Dzıýdodan Rıgada ótken Eýropa kýboginde Qazaqstan kósh bastady
ASTANA. QazAqparat – Latvııa astanasy Rıga qalasynda dzıýdodan erler men áıelder arasynda Eýropa kýbogi máresine jetti, dep habarlaıdy QazAqparat tilshisi.
Qazaqstan dzıýdo federatsııasynyń baspasóz qyzmetinen málim etkenindeı, 18-19 naýryzda ótken jarys qorytyndysynda el quramasy 3 altyn, 2 kúmis jáne 2 qola júldemen jalpy medal kestesinde kósh bastady.
Fınlıandııa quramasy ekinshi, Ýkraına dzıýdoshylary úshinshi orynnan kórindi.
Qazaqstandyqtardan Baqytjan Abdýrahmanov (73 kg), Aıbol Nysanáli (81 kg) jáne Erasyl Qajybaev (+100 kg) óz salmaq dárejeleri boıynsha jeńimpaz atansa, Nurzat Sálimbaev (66 kg) pen Elaman Erǵalıev (+100 kg) kúmis, Elaman Sultanbaı (66 kg) men Rýslan Musaev (81 kg) qola júldege ıe boldy.
Aıtýly dodaǵa 24 elden 200-ge jýyq sportshy qatysyp, baq synady.
Eske sala keteıik, budan buryn dzıýdodan Qazaqstan jasóspirimder quramasynyń Eýropa kýboginde 6 medal jeńip alǵanyn jazǵan bolatynbyz.
