Dzıýdodan Qazaqstan Barysy Grand Slam jarysyna Qazaqstannan kimder qatysady
ASTANA. QazAqparat – Astanada 16-18 maýsym kúnderi ótetin dzıýdodan Qazaqstan Barysy Grand Slam álemdik jarysyna qatysatyn qazaqstandyq sportshylar anyqtaldy, dep habarlaıdy QazAqparat tilshisi.
Qazaqstan dzıýdo federatsııasynyń baspasóz qyzmetinen málim etkenindeı, álemdik jáne olımpıadalyq reıtıngte upaı beretin bul dodada el namysyn ulttyq qurama kóshbasshylarymen birge jas sportshylar da qorǵaıdy.
Elorda tatamıinde myna dzıýdoshylarymyz baq synaıdy.
Erler:
-60 kg: Nurqanat Serikbaev, Maǵjan Shamshadın, Qanat Seıilhan, Dáýren Sıýkenov.
-66 kg: Ǵusman Qyrǵyzbaev, Ermek Amangeldi, Aıbolat Ystybaı, Suńǵat Jubatqan.
-73 kg: Danııar Shamshaev, Jansaı Smaǵulov, Darhan Qoıbaǵar, Asqar Narqulov.
-81 kg: Aıbol Nysanáli, Rýslan Mýsaev, Abylaıhan Jubanazar, Bekádil Shaımerdenov.
-90 kg: Ermahan Anýarbekov, Muhammedalı Mavlıdov, Qudyret Dosymov, Aıan Baıǵazy.
-100 kg: Nurlyhan Sharhan, Bekarys Sadýaqas, Bekzat Shaǵataev, Islam Bozbaev.
+100 kg: Ǵalymjan Qyryqbaı, Ádil Orazbaev, Erasyl Qajybaev, Mádı Edilbaev.
Áıelder:
-48 kg: Ábıba Ábýjaqynova, Ǵalııa Tynbaeva, Janerke Asqarova, Nuraılym Sársenbek.
-52 kg: Tolǵanaı Ábeýova, Qundyz Jylqybaı, Gaýhar Ermaǵambetova.
-57 kg: Sevara Nyshanbaeva, Baqyt Qusaqbaeva, Balnur Qurmanbaı, Dana Ábdirova.
-63 kg: Móldir Narynova, Esmıgúl Kýıýlova, Anastasııa Morozova.
-70 kg: Anastasııa Maıakova, Roza Nysantaıqyzy, Dıana Telbaeva.
-78 kg: Arýna Jangeldına, Nazerke Tileýhanova, Margarıta Grıtsenko.
+78 kg: Kamıla Berliqash, Aqerke Ramazanova, Nazgúl Maratova.
Elordadaǵy «Barys Arena» sport kesheninde ótetin bul týrnırge 45 elden 400-den astam sportshy qatysady dep josparlanǵan. Jarysqa kirý tegin.
Aıta keteıik, bıyl Qazaqstan dzıýdo federatsııasy Halyqaralyq dzıýdo federatsııasymen (IJF) álemdik Grand Slam jarysyn elimizde ótkizý týraly tórtjyldyq kelisimshartqa qol qoıǵan bolatyn. Ekijaqty kelisimshartqa sáıkes, Qazaqstan álemdik Grand Slam jarysyn 2023-2026 jyldar aralyǵynda qabyldaıdy.
Sonymen qatar, bul dodanyń nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngterde upaılar bólinedi. Atap aıtqanda, jeńimpazǵa 1000, kúmis júldegerge – 700, al 3 oryn ıegerine 500 upaı beriletin bolady.
«Qazaqstan barysy Grand Slam» týrnırinde dzıýdoshylar 2024 jyly Parıjde jáne 2028 jyly Los-Andjeleste ótetin jazǵy olımpıada oıyndaryna qatysý úshin upaı jınaıdy.
