Dzıýdodan QR Qorǵanys mınıstriniń birinshi ashyq kýbogy aıaqtaldy
ASTANA. 21 naýryz. QazAqparat - QR QM AOSK Almaty qalasyndaǵy oqý-jattyǵý ortalyǵy bazasynda dzıýdodan QR Qorǵanys mınıstriniń birinshi ashyq kýbogy aıaqtaldy.
Jarys Qazaqstan Respýblıkasy Qorǵanys mınıstrligi Sport komıteti - Armııashylardyń ortalyq sport klýbynyń sporttyq is-sharalar josparyna sáıkes ótkizildi.
Atalǵan mınıstrliktiń málimetinshe, jarysqa elimizdiń oblystary men qalalarynan 21 komanda, onyń ishinde 14 erler jáne 7 áıelder komandasy, barlyǵy 252 sportshy qatysty. Qazaqstan Qarýly Kúshterinen áıelder men erlerden jasaqtalǵan eki komanda baq synady.
Komandalyq synaqta birinshi oryndy QR Qarýly Kúshteriniń erler men áıelder qurama komandalary aldy. Ekinshi oryndy Shyǵys Qazaqstan oblysy ıelense, úshinshi oryndy Aqtóbe oblysynyń dzıýdoshylary baǵyndyrdy.
Áıelder arasyndaǵy jarysta ekinshi oryndy AOSK-2 komandasy alsa, úshinshi oryndy Pavlodar qalasy men Almaty oblysynyń qurama komandalary bólisti.
Armııashylardan quralǵan qurama komanda sportshylary joǵary nátıjelerge jetti. Merzimdi qyzmettiń qataryndaǵy jaýyngery Eldos Smetov (60 kg) altyn alsa, QR QK sportshysy Ilıas Izmagılov (66 kg) kúmiske ıe boldy. Kelisimshart boıynsha qatardaǵy jaýynger Bolatbek Jumagerıev (66 kg) qolany ıelendi. Sonymen qatar, QR QK sportshylary Eldos Jumahanov (73 kg) pen merzimdi qyzmettiń qatardaǵy jaýyngery Qural Samalıev (93 kg) qola júldegerler atandy.
Kelisimshart boıynsha qatardaǵy jaýynger Talǵat Ámirenov pen merzimdi qyzmettiń qatardaǵy jaýyngeri Sabyrjan Ábildauly (100 kg) jeńis tuǵyryna kóterildi. Kelisimshart boıynsha kishi serjant Zámzagúl Faızollanova (78 kg) jeńis tuǵyrynyń ekinshi ornyna, al QR QK sportshysy Faıza Ádilbaeva (70 kg) úshinshi ornyna kóterildi. Kelisimshart boıynsha qatardaǵy jaýynger Alına Ten (57 kg) men Olesıa Kýtsenko (52 kg) altynǵa ıe bolsa, QR QK sportshylary Nazgúl Qubasheva (57 kg) qolany utty. Jalpy alǵanda, armııashylar 5 altyn, 2 kúmis jáne 5 qola medaldi ıelendi.
Bul is-shara aldaǵy shilde aıynda Astana qalasynda Qarýly Kúshterdiń 20 jyldyǵy qurmetine ótkiziletin Dostastyq armııalarynyń Spartakıadasyna qatysatyn Qazaqstan armııasynyń qurama komandasyn jasaqtaý úshin úmitker komandalardy anyqtady.
