Dzıýdodan QR erler quramasynan Tokıo Olımpıadasyna baratyndar ataldy

NUR-SULTAN. QazAqparat - Dzıýdodan erlerdiń QR ulttyq qurama komandasynyń bas bapkeri Ǵalymjan Jylgeldıev Tokıo Olımpıadasyna qatysatyn sportshylar tizimin jarııalady, dep habarlaıdy QazAqparat Olympic.kz saıtyna silteme jasap.

«Dzıýdodan Tokıo Olımpıadasyna baratyn quram búginde belgili. Osyǵan deıin aıtqanymyzdaı, Olımpıada oıyndaryna Olımpıadalyq reıtıngide joǵary orynda turǵan sportshy barady. Qazirgi tańda Qazaqstan erler quramasynyń 7 sportshysy reıtıngide tıisti upaıdy jınady. Alaıda ár salmaqtan bir sportshy ǵana qatysa alatyndyqtan, biz aldyńǵy qatarda turǵan sportshyǵa múmkindik bergendi qup kórdik.

Álem chempıonatyna deıin ulttyq quramanyń bapkerleri aqyldasyp, 60 kelide Ǵusman Qyrǵyzbaevty álem birinshiligine, al Eldos Smetovti Olımpıada oıyndaryna daıyndaǵandy jón sanadyq. Eki sportshymyzdy eki mańyzdy jarysqa arnaıy daıyndadyq. Ǵusman Qyrǵyzbaev Býdapeshte úmitimizdi aqtap, álem chempıonatynyń kúmis júldesine ıe boldy.

Al 66 kelide Eldos Jumaqanov pen Erlan Serikjanovtyń arasyndaǵy báseke óte tartysty júrdi. Bes jylǵa sozylǵan olımpıadalyq tsıklde eki dzıýdoshyǵa birdeı múmkindik berilip, álemdik jarystarǵa qatar shyqty. Álem chempıonatynyń aldynda dál osy salmaq boıynsha da bapkerlermen aqyldasyp, Tokıoǵa baratyn sportshy álem chempıonatynan keıin belgili bolady dep tarqasqanbyz. Ózderińiz kórgendeı, Eldos Jumaqanov álem birinshiliginiń jartylaı fınalyna deıin jetip, jarysta besinshi boldy. Júldegerler qatarynan kóringende, sózsiz, Eldos olımpıadalyq reıtıngide aldyńǵy qatarǵa shyǵatyn edi. Alaıda, jaraqatyna baılanysty ol jartylaı fınalda toqtady.

Qazirgi tańda 66 kelide Erlan Serikjanov reıtıngide joǵary tur. Sondyqtan osy salmaq boıynsha Erlan Serikjanov Tokıo Olımpıadasynda el namysyn qorǵaıdy.

Al qalǵan salmaqtar boıynsha reıtıngide tıisti upaı enshilegen balýandar Tokıoǵa attanady.

73 kelige deıingi salmaq dárejesinde Jansaı Smaǵulov, 90 kelide Islam Bozbaev Olımpıada oıyndaryna qatysady. 81 kelige deıingi salmaq dárejesinde Dıdar Hamza qurlyqtyq kvotaǵa ıe boldy.

Osylaısha, Tokıo Olımpıadasyna erler quramasynan jalpy sany 5 dzıýdoshy qatysady. Olar: Eldos Smetov (60 kg), Erlan Serikjanov (66 kg), Jansaı Smaǵulov (73 kg), Dıdar Hamza (81 kg) jáne Islam Bozbaev (90 kg)», - deıdi dzıýdodan Qazaqstan ulttyq qurama komandasynyń bas bapkeriǴalymjan Jylgeldıev.