Dzıýdodan QR chempıonaty: Aralas komandalyq saıys jeńimpazdary anyqtaldy
ASTANA. QazAqparat - Astanada dzıýdodan ótip jatqan el birinshiliginde aralas komandalyq saıysta jeńimpaz-júldegerler belgili boldy, dep habarlaıdy QazAqparat tilshisi.
Qazaqstan dzıýdo federatsııasynan málim etkendeı, komandalyq synda Atyraý oblysynyń quramasy altynnan alqa taqty.
Almaty oblysynyń tatamı sheberleri ekinshi orynǵa kóterilse, jambyldyqtar men shyǵysqazaqstandyqtar qola júldeni qanjyǵasyna baılady.
Halyqaralyq dzıýdo federatsııasynyń erejesine sáıkes, aralas komandalyq saıysta ár komanda alty salmaq dárejesi (áıelder: -57 kg, -70 kg, +70 kg, al erler -73 kg, -90 kg jáne +90 kg) boıynsha beldesti.
Osymen 13-16 qarasha aralyǵynda ótken Qazaqstan chempıonaty márege jetti. Onyń qorytyndysynda jekeleı birinshilikte Almaty oblysynyń dzıýdoshylary 4 altyn, 1 kúmis jáne 1 qola medalmen jalpykomandalyq esepte kósh bastady. Mańǵystaý oblysynyń quramasy 3 altyn, 2 kúmispen ekinshi orynǵa jaıǵassa, qyzylordalyqtar 2 altyn, 3 kúmis, 5 qola júldemen úzdik úshtikti túıindedi.
Endi el quramasy aldaǵy iri halyqaralyq jarystarǵa qatysady.
Chempıonattyń ekinshi jarys kúninde bes salmaq dárejesi boıynsha QR chempıondary anyqtalǵanyn jazǵan bolatynbyz. Keıinnen jekeleı syndaǵy jeńimpazdar belgili boldy.
