Dzıýdodan klýbtar arasyndaǵy halyqaralyq týrnır jyl saıyn uıymdastyrylady - «TAK Astana» klýbynyń basshylyǵy
ASTANA. 1 qarasha. QazAqparat - Dzıýdodan klýbtar arasyndaǵy halyqaralyq týrnır jyl saıyn uıymdastyrylady. Bul týraly búgin Astanada týrnırdiń ashylýyna arnalǵan baspasóz máslıhatynda «TAK Astana» klýbynyń vıtse-prezıdenti Kıntal Islamov málim etti.
Onyń aıtýynsha, bıyl Qazaqstanda alǵash ret uıymdastyrylyp otyrǵan dzıýdodan klýbtar arasyndaǵy halyqaralyq týrnırge álemge áıgili biraz ujymdar shaqyrylǵan bolatyn. Olardyń ishinen Reseı, Ýkraına, Latvııa jáne Qyrǵyzstannyń kásibı dzıýdo klýbtary atalǵan sport dodasyna qatysýǵa nıet bildirdi.
«Osydan bastap biz Astanadaǵy dzıýdodan klýbtyq týrnırdi jyl saıyn ótkizetin bolamyz», - dep atap kórsetti «TAK Astana» klýbynyń vıtse-prezıdenti K. Islamov.
Aıta keteıik, dál qazir Astanadaǵy «Dáýlet» sport saraıynda týrnırdiń irikteý jekpe-jekteri ótýde. Keshki saǵat 18.30-da aqtyq syndar bastalady. Týrnırdiń syıaqy qory - 100 myń dollar. Birinshi orynǵa - 50 myń, ekinshi orynǵa - 30 myń, al úshinshi orynǵa - 20 myń dollar taǵaıyndalyp otyr.
