Dzıýdodan Qazaqstannyń kezekti chempıondary anyqtaldy
ASTANA. QazAqparat - Astanadaǵy «Dáýlet» sport kesheninde dzıýdodan ótip jatqan el chempıonatynda ekinshi jarys kúniniń nátıjeleri belgili boldy, dep habarlaıdy QazAqparat tilshisi.
Qazaqstan dzıýdo federatsııasynan málim etkendeı, bes salmaq dárejesi boıynsha jeńimpaz-júldegerler anyqtaldy.
Áıelder arasynda 57 kg salmaqta mańǵystaýlyqtar Anna Kazıýlına men Kámshat Qarashaıqyzy 1-2-oryndy ózara bólisti. Gúlnaz Nurdınova (Almaty oblysy) men Aıda Karchaeva (Jambyl) qola júldege ıe boldy.
63 kg salmaqta taǵy bir mańǵystaýlyq Aqnıet Turdan jeńimpaz atansa, atyraýlyq Nazgúl Qubasheva ekinshi, astanalyq Altynaı Habı men almatylyq Iolanta Berdibekova úshinshi orynǵa kóterildi.
70 kg salmaqta Almaty oblysynyń ókilderi Aelıta Şerbakova men Móldir Narynova sáıkesinshe altyn men kúmis medaldi jeńip aldy. Shyǵysqazaqstandyq Zere Bektasqyzy men qaraǵandylyq Ekaterına Tokorevanyń úlesine qola júlde tıdi.
Erler arasynda 73 kg salmaqta kútpegen nátıje tirkeldi deýge bolady. Munda qyzylordalyq Serik Aqylbek pen batysqazaqstandyq Ańsarbek Ǵaınýllın fınalǵa shyqty. Sońǵy básekede S.Aqylbek jeńimpaz atandy. Al Gran-prı kezeńiniń jeńimpazy, qaraǵandylyq Jansaı Smaǵulov pen jastar arasyndaǵy álem chempıonatynyń qola júldegeri, aqtóbelik Janbolat Baǵytbergenov qola júldeni qanaǵat tutty. Bul básekelestiktiń joǵary ekendigin kórsetedi.
81 kg salmaqta Jambyl oblysynan kelgen Salamat Jurqabaev eshkimdi shydatpasa, mańǵystaýlyq Rýslan Mýssaev fınalda ǵana utyldy. Almatylyq Qajymuqan Óteýlıev pen qaraǵandylyq Aıdyn Dartaev úshinshi orynmen shekteldi.
Eske sala keteıik, budan buryn Arystanbek Muhamedıulynyń úzdik dzıýdoshylar men bapkerlerdi marapattaǵanyn jáne alǵashqy jarys kúniniń nátıjelerin jazǵan bolatynbyz.
16 qarasha kúni márege jetetin jarys nátıjesinde 2019 jyly el namysyn qorǵaıtyn ulttyq qurama jasaqtalady.
Rıo Olımpıadasynyń kúmis júldegeri Eldos Smetov, álem chempıonatynyń kúmis júldegeri Erlan Serikjanov, Azııa oıyndarynyń chempıony Dıdar Hamza, Rıo Olımpıadasynyń qola júldegeri Galbadrah Otgontsetseg pen Azııa oıyndarynyń qola júldegeri Gúljan Isanova jaraqatyna baılanysty respýblıka birinshiligine qatysyp jatqan joq.
